मिडियालाई खिच्न दिइएन ‘बिकिनी किलर’ चार्ल्स शोभराजको तस्बिर

८ पुष, काठमाडौं । सञ्चारमाध्यमले १९ वर्षपछि जेलमुक्त भएका सिरियल किलर फ्रान्सेली नागरिक चार्ल्स शोभराजको तस्बिर खिच्न पाएनन् । जेलबाट छुटेको तस्बिर मिडियालाई खिच्न नदिन प्रहरीसँग उनले यसअघि आग्रह गरेको बताइएको थियो ।

शोभराजको आग्रहअनुसार प्रहरीले उनलाई मिडियासम्म पुग्न नदिएर तारजालीसहितकाे बा २ झ ३९८० नम्बरकाे  सेताे रंगकाे भ्यानमा राखेर अध्यागमन विभाग पुर्‍याएको छ । उनलाई जतिसक्दो चाँडो फ्रान्स डिपोट गर्ने विभागको तयारी छ ।

बुधबार सर्वोच्च अदालतले उनलाई जेलमुक्त गरेर १५ दिनभित्र फ्रान्स पठाउन आदेश दिएको थियो । १९ वर्ष २ महिना लामो जेल बसाईँपछि शुक्रबार मात्र उनी रिहा भएका हुन् ।

उनलाई २०३१ सालमा काठमाडौं र बनेपा साँगामा दुई विदेशी युवतीको हत्या घटनामा अभियुक्तको रुपमा २०६१ मा काठमाडौंबाट पक्राउ परेका थिए । घटनापछि फरार रहेका उनलाई इन्टरपोलमा सूचना जारी गरी खोजी गर्ने क्रममा नेपालबाटै पक्राउ परेका थिए ।