सिद्धार्थ इन्स्योरेन्सले बोलायो साधारणसभा, ९ प्रतिशत बाेनस शेयर जारी गर्ने

८ पुष, काठमाडाैं। सिद्धार्थ इन्स्योरेन्स कम्पनीले २१औं वार्षिक साधारणसभा बोलाएको छ । कम्पनीको पुष ७ गते बसेको संचालक समितिको बैठकले पुष २९ गतेका लागि साधारणसभा बोलाएको जानकारी बिहीबार एक सर्वाजनिक सूचनामार्फत दिएको छ ।

साधारणसभा नेपाल पर्यटन बोर्डको सभाकक्ष, भृकुटी मण्डप, काठमाडौंमा बिहान ११ बजे बस्ने सूचनामा उललेख छ ।
साधारण सभामा गत आर्थिक वर्षको मुनाफाबाट शेयरधनीहरुलाई प्रस्ताव गरेको कायम चुक्तापुँजीको ९ प्रतिशत बोनस शेयर र कर प्रयोजनका लागि ०.४७३७ प्रतिशत नगद लाभांश वितरण, लेखा परीक्षक नियुक्ति र निजको पारिश्रमिक तोक्नेबारे प्रस्ताव गरिनेछ ।

साथै सिद्धार्थ इन्स्योरेन्स र प्रिमियर इन्स्योरेन्सबीच मर्जर सम्बन्धमा सबै प्रस्तावहरु पारित गर्नेछ । मर्जरपछि बन्ने कम्पनीको नाम ‘सिद्धार्थ प्रिमियर इन्स्योरेन्स लिमिटेड’ कायम गरिने प्रस्ताव पनि पेश हुन जनाइएको छ । कम्पनीले साधारणसभा प्रयोजनका लागि पुष १८ गते एकदिन बुक्लोजको मिति तोकेको छ ।

यस्तै साधारणसभामा भाग लिन प्रतिनिधि नियुक्त गर्न चाहने शेयरधनीहरुले प्रोक्सी फाराम भरेर साधारण सुरु हुनुभन्दा ४८ घण्टापहिल्यै सिद्धार्थ इन्स्योरेन्सको मुख्य कार्यालय बबरमहलमा बुझाइसक्नुपर्ने सूचनामा जनाइएको छ ।

कम्पनीकाे प्रबन्ध पत्र र नियमावलीका केही बुँदा संशाेधनबारे पनि प्रस्ताव पेस गरिने जनाइएकाे छ ।