‘मधेशी भाषा’मा शपथबारे मधेशी आयोगद्वारा संसद् सचिवालयसँग स्पष्टीकरण माग

८ पुष, काठमाडौं । नवनिर्वाचित सांसदहरुले ‘मधेशी भाषा’मा शपथ लिएकोबारे मधेशी आयोगले संघीय संसद् सचिवालयलाई स्पष्टीकरण माग गरेकाे छ ।

भाषा आयोगबाट प्रकाशित ‘सरकारी कामकाजका भाषासम्बन्धी सिफारिसहरू (२०७८’ र मधेशी आयोगमा मधेशी भाषा सूचीकृत नरहेकाले उक्त भाषामा प्रतिनिधिसभाका सदस्यले शपथ लिने विषय गम्भीर भएको समेत उल्लेख गरेको छ ।

आयोगले सांसदरुहलाई कुन आधारमा मधेशी भाषामा शपथ दिएको भनी स्पष्ट पार्न संसद् सचिवालयलाई निर्देशन दिएको छ ।

बिहीबार जनमत पार्टीका अध्यक्ष डा. चन्द्रकान्त (सिके) राउतसहित ३ सांसदले मधेशी भाषामा शपथ लिएका थिए ।राउत लगायतका सांसदहरूको शपथ ग्रहणको विषयलाई लिएर मधेशमा विरोधसमेत सुरु भएको छ ।