बालुवाटारमा तीन दलका शीर्ष नेताको बैठक

८ पुस, काठमाडौं । सरकार गठन लगायतका विषयमा छलफल गर्न सत्ता गठबन्धनका तीन दल नेपाली कांग्रेस नेकपा माओवादी र नेकपा एकीकृत समाजावदीका शीर्ष नेता छलफलमा जुटेका छन् । राष्ट्रपतिले सरकार बनाउन दिएको समय सकिँदै गएको अवस्थामा सहमतिका लागि नेताहरु छलफलमा जुटेका हुन् ।

प्रमुख ३ दलको बैठक प्रधानमन्त्री निवास बालुवाटारमा अपरान्ह ४ बजेदेखि सुरु भएको हो । बैठकमा नेपाली कांग्रेस, नेकपा माओवादी केन्द्र र नेकपा एकीकृत समाजवादीका शीर्ष नेता सहभागी छन् ।

बैठकमा राष्ट्रपति, प्रधानमन्त्रीलगायतका शीर्ष पद बाँडफाँटका बारेमा निर्णायक छलफल हुने नेताहरुले बताएका छन् । प्रधानमन्त्रीमा कांग्रेस लचिलो भएपछि सत्ता गठबन्धन सहमति नजिक पगेको बताइएको छ ।