सरकारको ध्यान आत्मनिर्भर अर्थतन्त्र निर्माणमा केन्द्रित छ : मन्त्री बडू

८ पुष, सिन्धुली । उद्योग, वाणिज्य तथा आपूर्ति मन्त्री दीलेन्द्रप्रसाद बडूले सरकारको पूरै ध्यान आत्मनिर्भर अर्थतन्त्र निर्माणमा रहेको बताएका छन् ।

उद्योग वाणिज्य संघ सिन्धुलीले सिन्धुलीमाढीमा आयोजना गरेको छैटौँ सिन्धुली महोत्सवको आज उद्घाटन गर्दै उनले मुलुकको अस्वस्थ अर्थतन्त्र सुधारका लागि सरकारले विशेष योजना अघि सारेको बताए ।

उनले उद्योगहरुको उत्पादन बढाउनका लागि निजी क्षेत्रको सहकार्य आवश्यक रहेको बताउनुभयो । आर्थिक नीति र मौद्रिक नीतिमा सुधारका लागि क्षमता अनुसार काम गर्ने उनको भनाइ छ ।

चालु आवको बजेटमार्फत् राष्ट्रिय उत्पादन र उपभोग बढाउने नीति लिइएको र सोही अन्तर्गत नेपाली उत्पादन र उपभोग कार्यक्रम १० वर्षे अभियान सुरु भएको उनले जानकारी दिए । उनले यस वर्ष ३० वटा औद्योगिक ग्राम स्थापना हुने बताए । ग्रामीण तहमा उद्योग स्थापना गर्ने र रोजगारी सिर्जना गरी युवालाई उद्यमशीलतामा जोड्न सकेमात्र अर्थतन्त्रमा सुधार आउन सक्ने उनको भनाइ छ ।

‘हातमा सीप हुनेहरुलाई उद्यमशिलताका रु पाँच लाखदेखि २५ लाखसम्म विउ पुँजी दिइनेछ’ उनले भने, ’युवा र महिलालाई उद्यम सुरु गर्नका लागि सरकारले बिउ पूँजी दिने गरी विषेश कार्यक्रम सञ्चालनको तयारी भइरहेको छ ।’

जिल्लामा आयोजना हुने महोत्सवले स्थानीय उत्पादनको प्रचार र बजारीकरणका लागि सहयोग पुग्ने विश्वास व्यक्त गर्दै महोत्सवमा संघीय सरकारले पनि सहयोग गर्ने प्रतिवद्धता जनाए ।

‘‘कृषि उद्योग, पर्यटन र व्यवसायमा लगानी अभिवृद्धि गरौँ, समृृद्धि र सम्मुनत सिन्धुली निर्माणका लागि अघि बढौँ’ नाराकासाथ पुष १८ देखि महोत्सव संचालन हुनेछ ।