सभापति देउवाले सरकार गठनबारे अन्तिम निर्णय लिन सांसदहरुलाई बोलाए बालुवाटार

९ पुष, काठमाडौं । सत्ता गठबन्धनमा नयाँ सरकार गठन र पहिलो चरणका प्रधानमन्त्रीका विषयमा सहमति जुट्न नसकेपछि प्रधानमन्त्रीसमेत रहेका नेपाली कांग्रेसका सभापति शेरबहादुर देउवाले प्रतिनिधिसभामा नवनिर्वाचित सबै सांसदहरुलाई छलफलका लागि बालुवाटार बोलाएका छन् ।

उनले राष्ट्रपति दिएको समय नजिकिँदै गएको र पार्टीको सरकारबारे एकल धारणा बनाउनका लागि सांसदहरुलाई बोलाएको बताइएको छ । संसदीय दलको नेतासमेत रहेका देउवाले शनिबार मध्याह्न साढे १२ बजे प्रधानमन्त्री निवास बालुवाटारमा पार्टीका सांसदहरुलाई भेला हुन निर्देशन दिएका छन् ।

सांसदहरुको भेलामा सरकार निर्माणलगायत विकसित पछिल्लो राजनीतिक घटनाक्रमका विषयमा केन्द्रित हुने छलफलबाट साझा धारणा बनाउने बताइएको छ । अहिलेसम्म नेकपा माओवादी केन्द्रले पहिलो चरमा प्रधानमन्त्रीको दाबी गर्दै आएको छ । उसले अरु विषयमा लचकता देखाउन सकिने भएपनि प्रधानमन्त्री आफुले पाउनुपर्ने भन्दै नपाए समीकरण बदल्ने चेतावनी दिएको छ ।

माओवादी केन्द्रका अध्यक्ष पुष्पकमल दाहाल प्रचण्डले आफूलाई पहिलो चरणमा प्रधामन्त्री बनाउनुपर्ने अडान राख्दै आएका छन् । तर, आफ्नै आकांक्षा र पार्टीको दबाबका कारण कांग्रेस सभापति शेरबहादुर देउवा प्रचण्डको प्रस्ताव स्वीकार गर्न तयार छैनन् । यसै विषयमा सांसदको धारणा बुझ्न देउवाले भेला बोलाएको उनको निजि सचिवालयले जानएको छ ।