गठबन्धन नफुटेसम्म एमाले सरकार बनाउन अघि सर्दैनः पोखरेल

९ पुष, धनकुटा । नेकपा एमालेको वरिष्ठ उपाध्यक्ष इश्वर पोखरेलले सत्ता गठबन्धन नफुटेसम्म एमाले सरकार बनाउने विषयमा अग्रसर नहुने बताएका छन् । सत्ता गठबन्धनमा विभाजन नल्याएसम्म अर्को सरकार बनाउन असहज रहेको भन्दै पोखरेलले एमालेले सरकार बनाउनका लागि सबैभन्दा पहिलो गठबन्धनमा विभाजन आउनुपर्नेमा जोड दिएका छन् ।

प्रेस चौतारी नेपाल धनकुटाले शनिबार आयोजना गरेको पत्रकार सम्मेलनमा बोल्दै वरिष्ठ उपाध्यक्ष पोखरेलले अहिलेको गठबन्धन लोकतन्त्र, मुलुकको हितमा नरहेपनि अहिलेको राजनीतिक परिदृष्य एमाले सरकार बनाउने खेलमा लाग्ने खालको नरहेको प्रस्ट पारे ।

उनले भर्खरै सम्पन्न निर्वाचनमा जनताले एमालेलाई सरकारले जाने जनादेश नदिएको र जनताले दिएको जनादेशलाई सम्मानका साथ लिएर अघि बढ्ने बताए । तर गठबन्धन तोडेर कांग्रेस र माओवादी केन्द्र आए छलफल गर्न सकिने उनको तर्क छ । पोखरेलले गठबन्धनबिना मुख्य राजनीतिक दलहरू मिलेर समझदारीमा अघि बढे एमाले सरकारमा जान सक्ने संकेत पनि गरे । सत्ता गठबन्धनका कारण मुलुक अधोगतितर्फ लागिरहेको भन्दै मुख्य दलसँग समझदारी कायम गर्न जरुरी रहेको उनको कथन थियो ।

गठबन्धनका कारण मुलुकमा सामाजिक सांस्कृतिक रुपमा समेत अधोगतिमा लागेको भन्दै उनले गठबन्धन दलबाटै सरकार बनाउने खिचडी पाक्नेमा विश्वस्त नरहेको भन्दै यसको विकल्प नै मुख्य दलहरूको एकता जरुरी रहेको बताए । ‘गठबन्धन रहुन्जेल एमाले सरकारमा जान सक्दैन,’ उनले भने, ‘यदि मुख्य राजनीतिक दलहरूबीच समझदारी कायम रहे एमालेले सोच्नेछ ।’

यसैगरी, नेता पोखरेल मुख्य दलबीचको समझदारी कायम गर्न कांग्रेस बाधक रहेको उल्लेख गरे । उनले निर्वाचनमा एमालेलाई टर्च बालेर खोज्नुपर्ने भन्नेहरूलाई जनमतले गतिलो जवाफ दिएको बताए । फरक प्रसंगमा पोखरेलले निर्वाचनमा आफ्नो पराजयको मुख्य कारण गठबन्धनलाई चिर्न नसक्नु भएको बताए ।