कीर्ते विवरणमा नेपाली नागरिकता लिने म्यानमारका नागरिक पक्राउ

१० पुष, काठमाडौं । झुटो विवरण पेस गरेर नेपाली नागरिकता र राहदानी प्रमाणपत्र लिने म्यानमारका नागरिक मोहमद नुर आलमलाई प्रहरीले पक्राउ गरेको छ । काठमाडौं उपत्यका अपराध अनुसन्धानको विशेष टोलीले उनलाई पक्राउ गरेको हो।

१० वर्षअघि म्यानमारबाट नेपाल आई उनी सर्लाही त्रिभुवननगरमा बस्दै आएका आलमले आफू नेपाली नागरिककै सन्तान भएको झुटो विवरण पेस गरेर नागरिकता लिएर राहदानी बनाएका थिए ।

ठगीसम्बन्धी एक घटनामा पक्राउ गरी अनुसन्धान गर्दा उनको थप कर्तुत पत्ता लागेको अपराध अनुसन्धान कार्यालयका एक अधिकारीले बताए । उनले सर्लाहीको मदरसामा पढाउँदै आएको बुझिएको छ ।

आलमलाई अदालतबाट म्याद थप गराइ हिरासतमा राखी आवश्यक अनुसन्धान भइरहेकाे प्रहरीले जनाएकाे छ ।