प्रधानमन्त्री देउवा र माओवादी अध्यक्ष प्रचण्डबीच निर्णायक छलफल

१० पुस, काठमाडौं । प्रधानमन्त्री शेरबहादुर देउवा र नेकपा माओवादीका अध्यक्ष पुष्पकमल दाहाल‘प्रचण्ड’बीच पेचिलो बन्दै गएको प्रधानमन्त्री पदबारे सहमतिका अन्तिम छलफल भएको छ । सत्ता गठबन्धनको बैठक बस्नु अघि प्रधानमन्त्री देउवा र अध्यक्ष प्रचण्डले छुट्टै छलफल गरेका छन् । प्रधानमन्त्री निवास बालुवाटारमा देउवा र प्रचण्डबीच छलफल चलिरहेको छ ।

प्रधानमन्त्रीका प्रेस संयोजक गोन्दि परियारमका अनुसार सत्ता गठबन्धनमा छलफल गर्नु अघि कांग्रेस र माओवादी केन्द्रको नेतृत्वबीच छुट्टै छलफल भएको हो । दुई शीर्ष नेताहरुको छलफललगत्तै सत्ता गठबन्धनको बैठक बस्ने छ । सत्ता गठबन्धनको बैठक अघि कांग्रेस शीर्ष नेताहरुको बैठक बालुवाटारमै बसेको थियो ।

राष्ट्रपति विद्यादेवी भण्डारीले आज अपराह्न ५ बजेभित्र बहुमतसहित सरकारका नेतृत्वमा दाबी प्रस्तुत गर्न दलहरुलाई समयसीमा दिएकी छन् । सोही समयभित्रै सहमति जुटाउने प्रयासमा नेताहरु सक्रिय छन् । बैठकमा सहभागी एक नेताका अनुसार गठबन्धनकै सरकार बनाउन कांग्रेस, माओवादी केन्द्र र एकीकृत समाजवादीका शीर्ष नेताहरु सहमत छन् ।

कांग्रेस सभापति शेरबहादुर देउवा र माओवादी अध्यक्ष प्रचण्डले २÷२ वर्ष सरकारको नेतृत्व गरेपछि प्रतिनिधिसभाको कार्यकालको बाँकी एक वर्ष एकीकृत समाजवादीका अध्यक्ष माधवकुमार नेपालले सरकार चलाउने विकल्पमा पनि छलफल भइरहेको छ । यद्यपि देउवा र प्रचण्डमध्ये पहिले को प्रधानमन्त्री हुने भन्ने विषयमा एकमत हुन सकेको छैन ।

सत्ता गठबन्धनमा सहमति हुन नसकेको परिस्थितिको सम्भावनालाई ख्याल गर्दै कांग्रेस र माओवादी दुवैले नेकपा एमालेसँग पनि छलफल जारी राखेका छन् । कांग्रेस नेता विमलेन्द्र निधिले शनिबार बेलुकी एमाले अध्यक्ष केपी शर्मा ओलीसँग छलफल गरेका थिए । निधिले आइबार विहान १० बजे प्रचण्डलाई निवासमै पुगेर भेटेका थिए । त्यस पछि प्रचण्ड बालुवाटार पुगेर देउवासँग छलफल सुरु गरेका हुन् ।