बालुवाटारबाट बाहिरिएका प्रचण्ड बालकाेट पुगे

१० पुष, काठमाडौं । नयाँ बन्ने सरकरमा प्रधानमन्त्रीको पहिलो कार्यकाल लिनेबारे बालुवाटारमा भइरहेको सत्ता गठबन्धनको बैठकबाट नेकपा (माओवादी केन्द्रंका अध्यक्ष पुष्पकमल दाहाल ‘प्रचण्ड’ बहिरिएका छन् । उनी अहिले एमालेका अध्यक्ष केपी शर्मा ओलीलाई भेटन भक्तपुरकाे बालकाेट पुगेका छन् ।

उनीपछि नेकपा (एकीकृत समाजवादी)का अध्यक्ष माधवकुमार नेपाल र वरिष्ठ नेता झलनाथ खनाल पनि बैठक छाडेर बाहिरिएका छन् । बैठक कांग्रेस सभापति समेत रहेका प्रधानमन्त्री शेरबहादुर देउवा, प्रचण्ड, नेपाल र खनालबीच सत्ता र सरकारका शक्ति बाँडफाँटबारे निर्णायक छलफल चलिरहेको थियो ।

प्रधानमन्त्री निवास बालुवाटारमा आज बिहान बसेको बैठकमा नेपाली कांग्रेसले राष्ट्रपति र प्रधानमन्त्री दुवै पद छाड्न नसक्ने अडान लिएपछि प्रचण्ड त्यहाँबाट बाहिरिएकाे स्राेतले बतायाे ।

बहुमतसहित सरकारको नेतृत्वमा दाबी गर्न राष्ट्रपति विद्यादेवी भण्डारीले दिएको सात दिनको समयसीमा आज साँझ ५ बजे सकिँदैछ

बालुवटारको गठबन्धन बैठक छाडेपछि अध्यक्ष प्रचण्डले नेपाली कांग्रेसले पूर्वसहमति तोडेको आरोप समेत लगाएका छन् । ‘नेपाली कांग्रेसले सहमति तोडेर गठबन्धन टुटाउने काम गरेको छ, अहिलेलाई यति बुझौं’ प्रचण्डको भनाइ उदृध गर्दै माओवादी केन्द्रका एक नेताले बताए । ती नेताका अनुसार अब एमाले मिलेर सरकार गठन गर्नेबारे छलफल गरेर नयाँ सरकार बनाउने विषयलाई आजै टुंग्याइने छ ।