बालकोटमा बैठकमा माधव-झलनाथ गएनन्

१० पुष, काठमाडौं । नेकपा (एमाले)का अध्यक्ष केपी शर्मा ओलीको निवास भक्तपुरस्थित बालकोटमा संसदमा प्रतिनिधित्व रहेका चार दलबीच नयाँ सरकार गठनबारे छलफल जारी छ ।

एमाले अध्यक्ष ओली, माओवादी नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड।, राष्ट्रिय स्वतन्त्र पार्टी (रास्वपा)का सभापति रवि लामिछाने र जनता समाजवादी पार्टीका नेता अशोक राईलगायतका नेताहरुबीच छलफल भइरहेको छ ।

यसअघि ओलीले राप्रपाका अध्यक्ष राजेन्द्र लिङदेनसँग छलफल गरिसकेका छन् । शक्ति बाँडफाँट गर्नेबारे आइतबार बिहान नेपाली कांग्र्रेसको नेतृत्वमा रहेको सत्ता गठबन्धनको निर्णायक भनिएको वार्ता निष्कर्षविहीन बनेपछि संसदको तेस्रो शक्ति माओवादी केन्द्रका अध्यक्ष प्रचण्ड नेता नारायणकाजी श्रेष्टसहितको टिम लिएर ओलीसँग छलफलका लागि बालकोट पुगेका हुन् ।

बैठकमा गठबन्धनमा महत्वपूर्ण भूमिका निभाउँदै आइरहेका नेकपा (एकीकृत समाजजादी)का अध्यक्ष माधवकुमार नेपाल भने अनुपस्थित छन् । दोस्रो तहका नेता झलनाथ खनाल पनि उपस्थित छैनन् । यसअघि आइतबार बिहान बालुवाटारमा भएको कांग्रेसकोसँगको बैठकमा भने नेपाल र खनाल दुवै जना सहभागी थिए ।