बालकोटमा प्रचण्डलाई प्रधानमन्त्री बनाउने सहमति, पत्र लिएर राष्ट्रपति कार्यालय जाने तयारी

१० पुस, काठमाडौं । नेकपा माओवादी केन्द्रका अध्यक्ष पुष्पकमल दाहाललाई प्रधानमन्त्री बनाउन बालकोट गठबन्धन तयार भएको छ । बालकोटमा नेपाली कांग्रेस र नेकपा एकीकृत समाजवादीबाहेकाका दलहरु माओवादी अध्यक्ष प्रचण्डको नेतृत्वमा सरकार बनाउने सहमतिमा पुगेका छन् ।

नेकपा माओवादीकेन्द्रका नेता वर्षमान पुनका अनुसार प्रचण्डलाई प्रधानमन्त्री बनाउन सबै दल तयार भएका हुन् । यस्तै आजे राष्ट्रपति कार्यलयमा दावी पेश गर्ने तयारी गरिएको छ । प्रचण्डलाई प्रधानमन्त्री बनाउने सहमति भएको सन्देश राष्ट्रपति कार्यलयमा पुर्याएको छ । केही बेरमा पत्रसहित नेताहरु शीतल निवास जाने तयारीमा रहेको बताइएको छ ।

सत्ता गठबन्धनमा सहमति नजुटेपछि आजै बाम सरकारबाट प्रधानमन्त्रीसहित सरकारका लागि दावी पेस गर्न नेकपा एमालेका अध्यक्ष केपी शर्मा ओलीको निवासमा बाटकोटमा कांग्रेसबाहेकका दलहरु जम्मा भएका थिए । यसका लागि माओवादीका अध्यक्ष प्रचण्ड एमालेका अध्यक्ष ओलीको निवास भक्तपुरस्थित बालकोटमा पुगेका थिए । अहिले प्रधानमन्त्रीका विषयमा मोटामोटी सहमति सकिएको छ ।

एमाले लगायतका दलले नयाँ सत्ता समिकरण गर्दै माओवादी संसदीय दलका नेता पुष्पकमल दाहाललाई प्रधानमन्त्री बनाउने सहमति गरेका हुन् । एमाले अध्यक्ष ओलीको निवासमा आइतबार बसेको बैठकले दाहाललाई आधा कार्यकालका लागि प्रधानमन्त्रीको रुपमा अघि सारेको हो । साढे २ वर्षपछि एमालेले प्रधानमन्त्री लिनेछ ।

बैठकमा सहभागी माओवादी नेता वर्षमान पुनका अनुसार दाहाललाई प्रधानमन्त्रीमा अघि सार्दै राष्ट्रपतिसमक्ष आइतबारै दाबी पेश गर्ने सहमति छ । दाहाललाई एमालेका ७८, माओवादीका ३२, राष्ट्रिय स्वतन्त्र पार्टीका २०, राप्रपाका १४, जसपा १२ र अन्य साना दलको समेत समर्थन जुटेको बताइएको छ । सिके राउत नेतृत्वको जनमत पार्टीले पनि नयाँ गठबन्धनलाई सघाउने छ । जनमत पार्टीका महासचिव चन्दन सिंहले सरकार बनाउने प्रक्रियामा आफूहरुले समर्थन गर्ने बताए । जनमत पार्टीका ६ जना सांसद छन् ।