प्रधानमन्त्रीमा प्रचण्ड, राष्ट्रपति र सभामुखमा एमालेकाे दाबी

१० पुष, काठमाडौं । बालकोटको पाँच दलीय बैठकले नेकपा (एमाले) र नेकपा (माओवादी केन्द्र)बीच आलोपालो प्रधानमन्त्री बन्ने सहमति कायम गरेको छ ।

माओवादी केन्द्र, कांग्रेस नेतृत्वको गठबन्धन छाडेर आएपछि संसदको दोस्रो ठूलो दल एमालेका अध्यक्ष केपी शर्मा ओली प्रधानमन्त्रीमा आलोपालो गर्न सहमति जनाएसँगै आगामी पाँच वर्षे अवधिका लागि कार्यकाल टुंगो लागेको छ । पहिलो चरणमा प्रचण्डलाई प्रधानमन्त्री बनाउन ओलीले सहमति जनाएका छन् ।

पहिलो दल कांग्रेससँग ८९ सिट एमालेसँग ७८ सिट छन् । कांग्रेसले राष्ट्रपति, प्रधानमन्त्री र सभामुख पद नछाडेपछि एमालेसहितको समिकरणका सरकार बन्ने भएको हो । एमालेसहितको समिकरणमा राष्ट्रपति र सभामुखमा एमालेले दाबी गरेकाे नेताहरुले जनाएका छन् ।

प्रचण्डको नेतृत्वमा सरकार बनाउन १६६ सांसदको समर्थन जुटेको बैठकमा सहभागी नेताहरुको दाबी छ ।

तर बैठकपछि एमाले महासचिव पोखरेलले अहिले प्रधानमन्त्री पदबारे मात्र टुंगाे लागेकाे र बाँकी राष्ट्रपति, उपराष्ट्रपति, सभामुख, उपसभामुख लगायत विषयमा छलफल गर्दै जाने बताए ।