सरकारमा सहभागी हुने नहुने विषयमा जसपा अनिर्णित

११ पुष, काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’लाई प्रधानमन्त्रीमा नियुक्तिका लागि समर्थन जनाएको जनता समाजवादी पार्टी (जसपा) नेपाल सरकारमा जाने वा नजाने भन्ने विषयमा टुंगोमा पुग्न सकेको छैन ।

जसपाले सरकारलाई समर्थन गरे पनि सरकारमा जाने नजाने अझै टुंगो लागिनसकेको जसपाका एक कार्यकारिणी सदस्यले बताए । जसपाले संसदीय दलको नेता समेत चयन गर्न सकेको छैन ।

पार्टीका अध्यक्ष उपेन्द्र यादव मंसिरको ४ को चुनावमा पराजित भएपछि पार्टीभित्र दलको नेता भन्ने होडमा थुप्रैमा सांसदहरु लागेका छन् । दलकै नेता चयन गर्न नसकिरहेको जसपा सरकारमा जाने वा नजाने भन्नेबारे टुंगो लगाउन नसकेर अनिर्णित बन्न पुगेको छ । संसदीय दलको नेता चयन भएपछि मात्र सरकारमा जाने वा नजानेबारे छलफल हुने तीन सदस्यले बताए ।

अध्यक्ष यादव नयाँबानेश्वरमा जारी सत्ता गठबन्धनको दलहरुको बैठकमा सहभागी हुन गइसकेको र बैठक सकेर पार्टीको दलको बैठक राख्ने तयारी भएको बताइएको छ ।

प्रचण्ड नेतृत्वको सरकारका चौथो शक्ति राप्रपाले भने सरकारमा नजाने निर्णय लिइसकेको छ ।