क्रान्तिको बाटो बांगोटिंगो भएकोले विकास र समृद्धिका लागि सहकार्य गरौं : बाबुराम भट्टराई

११ पुष, काठमाडौं । पूर्वप्रधानमन्त्री समेत रहेका समाजवादी पार्टी नेपालका अध्यक्ष डा. बाबुराम भट्टराईले क्रान्तिको बाटो बांगोटिंगो र अनिश्चयले भरिएको बताएका छन् ।

आइतबार प्रधानमन्त्रीमा नियुक्त भएका नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’लाई बधाई शुभकामना दिँदै अध्यक्ष भट्टराईले सामाजिक संजाल ट्वीटरमा सन्देश पोष्ट गर्दै क्रान्तिको बाटो बागोटिंगोले भरिएको र प्राप्त उप्लब्धिहरुलाई संस्थागत गर्दै समृद्धिका लागि सहकार्य गर्नुपर्ने बताएका छन् । प्रचण्डलाई भेट गरेरै भट्टराई दम्पतिले बधाई शुभकामना दिएका छन् ।

उनले क्रान्तिको बाटो अनिश्चयपूर्ण बनेको भन्दै जीवनको अन्तिम कालखण्डसम्म देशलाई समृद्ध बनाउन सहकार्य गर्न सबै अघि सर्नुपर्ने बताए । उनले प्रचण्डलाई तेश्रो कार्यकालकानिम्ति देशको प्रधानमन्त्री बनेमा बधाइ तथा कार्यकालको पूर्ण सफलताको शुभकामना दिएका छन् ।

‘तेश्रो कार्यकालकानिम्ति देशको प्रधानमन्त्री बन्नुभएकोमा हार्दिक बधाइ तथा पूर्ण सफलताको शुभकामना ! क्रान्तिको बाटो बांगोटिंगो र अनिश्चयले भरिपूर्ण भएकाले जीवनको अन्तिम कालखण्डमा हामीले सम्पन्न गरेको जनक्रान्तिका उपलब्धीहरू संस्थागत गर्दै देशलाई समृद्ध बनाउन सहकार्य गरौं ! भट्टराईले ट्वीट गरेका छन् ।

एमाले, रास्वपा, राप्रपा, जसपा, जनमत लगायत ७ दलकोा समर्थनमा प्रचण्ड तेस्रो पटक प्रधानमन्त्रीमा नियुक्त भएका हुन् । उनको शपथग्रहण आज दिउँसो ४ बजे राष्ट्रपति कार्यालय शितलनिवासमा हुँदैछ ।