एमालेलाई सुरुमै ४ मन्त्रालय, को को बन्दैछन् मन्त्री ?

११ पुष, काठमाडौं । नेकपा (एमाले)ले उपाध्यक्ष विष्णु पौडेलसहित ४ जनालाई सरकारमा मन्त्री बनाउने भएको छ । उपप्रधान मन्त्री र अर्थ मन्त्रालयको जिम्मेवारी सम्हाल्ने गरी पौडेल सरकारमा पठाइँदैछ भने दामोदर भण्डारी, ज्वाला साह र राजेन्द्र राईलाई मन्त्री बनाउने एमालेले तय गरेको छ ।

केही बेरपछि नवनियुक्त प्रधानमन्त्री पुष्पकमल दाहाल प्रचण्डले शपथ लिँदैछन् । राष्ट्रपति कार्यालय शितल निवासमा हुने शपथ कार्यक्रममा सत्ता गठबन्धनबाट सिफारिसमा परेका अन्य उपप्रधानमन्त्री तथा मन्त्रीहरूले शपथ दिने जनाइएको छ ।

एमालेसहित ७ दलको समर्थनमा नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ आइतबार प्रधानमन्त्रीमा नियुक्त भएका हुन् । प्रचण्ड नेतृत्वको सरकारमा एमाले सबैभन्दा ठूलो दल हो । एमालसँग ७८ सांसद छन् । माओवादी केन्द्रसंग जम्मा ३२ सांसद छन् ।

सरकारमा सामेल अन्य दलहरु रास्वपासँग २०, राप्रपासँग १४, जसपासँग १२, जनमत पार्टीसँग ६, नागरिक नन्मक्ति पार्टीसँग ४ सांसद छन् । ३ जना स्वतन्त्र सांसदले पनि यो सरकारलाई समर्थन गरेका छन् । सरकारलाई १६९ सांसदकाे समर्थन रहेकाे छ ।

नयाँबानेश्वरस्थित संसद भवनमा बसेको सत्तारुढ दलहरुको बैठकबाट मन्त्रालयको भागबण्डा लगाएको हो । प्रचण्डले एमालेलाई शुरुमै ४ मन्त्रालय दिएका छन् । संघीय सरकारलाई २५ वटासम्म मन्त्रालयको संख्या पुर्याउन सकिने व्यवस्था छ ।