कर्णाली प्रदेशका सांसदले लिए शपथ

११ पुष, सुर्खेत । कर्णाली प्रदेशका नवनिर्वाचित प्रदेशसभा सदस्य (सांसद)हरुले पद तथा गोपनीयताको शपथ लिएका छन् । ज्येष्ठ सदस्य विनोदकुमार शाहले सोमबार सांसदहरुलाई प्रदेशसभा भवनमा शपथ ग्रहण गराएका हुन् ।

शपथ ग्रहण गर्नुअघि शाहलाई प्रदेश प्रमुख तिलक परियारले शपथ खुवाएका थिए । ज्येष्ठ सांसद शाहले प्रदेशसभा सदस्य निर्वाचन ऐन, २०७४ को दफा ७५ बमोजिम नवनिर्वाचित सांसदलाई शपथ खुवाएका हुन् । शाहले सभामुख र उपसभामुखको निर्वाचन नहुञ्जेलसम्म कार्यवाहक सभामुखको रुपमा प्रदेशसभा संचालन गर्नेछन् ।

४० सदस्वीय कर्णाली प्रदेश सभामा २४ जना प्रत्यक्षतर्फ र १६ जना समानुपातिक प्रणालीबाट सांसद बनेका हुन् । कर्णालीमा नेपाली कांग्रेसका १४, नेकपा माओवादी केन्द्रका १३, नेकपा एमालेका १०, नेकपा (एकीकृत समाजवादी) र राष्ट्रिय प्रजातन्त्र पार्टी (राप्रपा) का १/१ जना सांसद छन् । एक जना स्वतन्त्र सांसद छन् ।