माओवादी केन्द्र छाडेकी ज्वालाकुमारी बनिन् एमालेबाट मन्त्री

११ पुष, काठमाडौं । नेकपा (माओवादी केन्द्र) छोडेर एमाले प्रवेश गरेकी ज्वालाकुमारी साह एमाले कोटाबाट माओवादी केन्द्रका अध्यक्ष प्रचण्ड नेतृत्वको सरकारमा मन्त्री बनेकी छिन् ।

पहिलो संविधानसभामा माओवादीबाट समानुपातिक सांसद बनेकी साह २०७४ सालमा मधेस प्रदेशमा बाराको ३ (क) बाट प्रदेश सांसद निर्वाचित भएकी थिइन् ।

माओवादी केन्द्र र एमाले मिलेर बनेको तत्कालीन नेकपा सर्वोच्च अदालतको आदेशबाट पुरानै अवस्थामा फिर्ता हुँदा उनी एमालेमै बसिन् । यो पटकको प्रतिनिधिसभा निर्वाचनमा उनी एमालेका उम्मेदवार बनेर बारा ३ बाट प्रत्यक्षतर्फ निर्वाचित भइन् ।

उनले सोमबार राष्ट्रपति भवन शितल निवासमा आयोजित विशेष समारोहमा मन्त्री पदको शपथ लिएकी छन् । मन्त्रालय तोक्ने काम भने बाँकी नै छ ।

शपथका लागि जाने क्रममा ट्राफिक जाममा परेका कारण उनको शपथ पछि भएको थियो ।