माओवादी केन्द्रलाई २ मुख्यमन्त्री दिएर ४ वटा लिने ओलीकाे दाउ, जसपा र जनमतलाई मधेशमा आलोपालोमा धकेल्ने

१३ पुष, काठमाडौं । सरकारका मुख्य डिजाइनर मानिने नेकपा (एमाले) का अध्यक्ष केपी शर्मा ओलीले बुधबार बिहान प्रधानमन्त्री प्रचण्डको निवासमा पुगेर सातै प्रदेशका मुख्यमन्त्री पद बाँडफाँटबारे छलफल गरेका छन् ।

प्रचण्डसँगको ‘वान टू वान’ छलफलमा ७ प्रदेशमध्ये सरकारको नेतृत्व गरेको दल माओवादी केन्द्रलाई २, एमालेलाई ४ र मधेश प्रदेशमा भने जनमत पार्टी र जसपालाई आलोपालोमा मुख्यमन्त्री चलाउन सहमत गराउने बारे छलफल भएको बताएका छन् ।

एमाले र माओवादी केन्द्रले कुन कुन प्रदेश लिने भन्ने बारेकाे अर्को छलफलबाट टुंगो लगाउने गरी ओली खुमलटारबाट फर्किएका छन् ।

ओलीकाे प्रस्तावमा प्रचण्डले पार्टीभित्र छलफल गरेर टुंगाेमा पुग्ने बताएकाे स्राेतले जनायाे । प्रचण्ड र ओलीबीच सहमति जुटेपछि मात्र अन्य सत्ताघटक दलहरुसँग छलफलमा बस्ने विषयमा दुई नेता सहमत भएको स्रोतले बतायो ।

माओवादी केन्द्रलाई लुम्बिनी र सुदूरपश्चिममा धकेल्ने ओलीको योजना रहेको बताइएको छ । मधेसमा एमाले र माओवादी केन्द्र दुवै दल कमजोर छन् ।