कांग्रेसले अन्तरघातीहरूकाे सूची पठाउने समय बढायाे

१३ पुष, काठमाडौं । नेपाली कांग्रेसले प्रदेश र प्रतिनिधिसभा निर्वाचनमा पार्टीका उम्मेदवारलाई अन्तर्घात गरेका नेता कार्यकर्ताको सूची पठाउने समय थप गरेको छ ।

केन्द्रीय अनुशासन समितिले यसअघि प्रदेश र जिल्ला कार्यसमितिलाई परिपत्र यही पुस १५ भित्र अन्तर्घातीहरुको सूची पठाउन परिपत्र गरेकोमा यसलाई बढाएर आगामी माघ १५ गतेसम्मका लागि समय थपेको हो । कांग्रेस सचिव प्रेम केसीले बुधबार सूचना जारी गरेर उजुरी दिने समय थप गरिएको जनाएका छन् ।

परिपत्रमा कांग्रेसले गठबन्धनका उम्मेदवारलाई असहयोग गर्नेको पनि सूची पठाउन भनेको थियो । तर गठबन्धनमा रहेका दोस्रो दल माओवादी केन्द्र एमालेसँग मिलेर सरकार बनाएपछि माओवादी केन्द्रबाट गठनबन्धनका उम्मेदवार बनेकाहरुमाथि भोट क्रस गर्ने वा भोट नहाल्न भूमिका खेल्ने पार्टीका नेता कार्यकर्तामाथि कारवाही गर्दा ‘विचार’ पुर्याइने देखिएको छ ।

कांग्रेसको नेतृत्वमा माओवादी केन्द्र, एकीकृत समाजवादी पार्टी, लोसपा, राजमो गठबन्धन बनाएर चुनावमा गएका थिए । गठबन्धन यही पुस १० मा भत्किएपछि कांग्रेसले नयाँ तरिकाले छानबिन गर्ने तयारी भएको बताइन्छ ।