बागमती प्रदेशका ज्येष्ठ सांसद ढुंगानाले लिए शपथ

१३ पुष, हेटौंडा । बागमती प्रदेशसभाका ज्येष्ठ सांसद रामप्रसाद ढुंगानाले पद तथा गोपनियताको शपथ लिएका छन् । बागमती प्रदेशसभाका ११० सांसदमध्ये ज्येष्ठ सदस्य उनले प्रदेश प्रमुख यादवचन्द्र शर्माबाट आज प्रदेश प्रमुखको कार्यालयमा शपथ लिएका हुन् ।

ढुंगाना नेकपा (माओवादी केन्द्र)का तर्फबाट नुवाकोट २ (१) बाट प्रदेशसभा सदस्यमा निर्वाचित भएका थिए । निर्वाचन आयोगले प्रदेशसभा सचिवालय र प्रदेश प्रमुख कार्यालयलाई उपलब्ध गराएको विवरण अनुसार उनको जन्म २००६ साल असोज २ गते भएको हो ।

संवैधानिक व्यवस्था अनुसार प्रदेशसभामा सभामुख र उपसभामुख निर्वाचित नहुँदासम्म ढुंगानाले सभाको अध्यक्षता गर्नेछन् ।उनले बाँकी प्रदेशसभा सदस्यहरुलाई भोलि शपथ खुवाउनेछन् ।