सन्दीप लामिछानेको रिटमा उच्च अदालत पाटनमा सुनुवाइ हुँदै

१४ पुष, ललितपुर । राष्ट्रिय टिमका पूर्वकप्तान सन्दीप लामिछानेलाई पुर्पक्षका लागि कारागार चलान गर्ने जिल्ला अदालतको आदेशविरुद्धको पुनरावेदन मुद्दामा पेशी तोकिएको छ।

उच्च अदालत पाटनमा बिहीबारका लागि न्यायाधीश सुभाष पौडेल र किरणकुमार पोखरेलको संयुक्त इजलासमा पेशी तोकिएको हो । पेशी सुनुवाइको पाँचौं नम्बरमा परेको छ ।

जिल्ला अदालत काठमाडौंको आदेशविरुद्ध सन्दीपले उच्च अदालतमा पुनरावेदन निवेदन दिएका थिए । यसअघि गत ७ पुषका लागि पेशी तोकिएको थियो । तर, सर्वोच्च बारको अधिवेशनमा वरिष्ठ अधिवक्ताहरु व्यस्त भएपछि पेशी सरेको थियो ।

नुवाकोट घर भएकी एक ‘नाबालिग’ किशोरीलाई जबरजस्ती बलात्कारको अभियोगमा मुद्दा पुर्पक्षका लागि कारागार थुनामा पठाइएका लामिछानेका कानुन व्यवसायीले गत मंसिर २९ गते पुनरावेदन दर्ता गराएका थिए ।

लामिछानेकाे तर्फबाट पीडित भनिएकी किशोरीको ३ वटा जन्मदर्ता रहेको र उनी नाबालिग नभएको भन्दै अलालतमा प्रमाण पेश गरेका छन् । अदालतले त्यसबारेमा प्रमाण समेत झिकाइसकेको छ।

तीनै दोहोरो कागजातका आधारमा पीडित नाबालिग नरहेको र लामिछानेले जबरजस्ती करणी पनि नगरेको दाबीसहित उनी पक्ष उच्च अदालत पुगेको हो ।