सत्ता साझेदार दल पुरानै ढर्रामा, न्यूनतम् साझा कार्यक्रम ल्याउने सहमति

१४ पुष, काठमाडौं । सत्ता साझेदार दलले न्यूनतम् साझा कार्यक्रम ल्याउने निर्णय गरेर पुरानै ढर्रा दाेर्याएका छन् । सोका लागि बालुवाटारमा बिहीबार बिहान बसेको सत्ता साझेदार दलको बैठकले सरकारमा सामेल ठूलो दल नेकपा (एमाले)का अध्यक्ष केपी शर्मा ओलीको संयोजकत्वमा कार्यदल गठन गरिसकेको छ ।

सोही बैठकले सरकारले गर्न सक्ने किसिमका कार्यक्रम समेटेर ५ दिनभित्र न्यूनतम साझा कार्याक्रम ल्याउन निर्णय भएको उपप्रधान तथा गृहमन्त्री रवि लामिछानेले बताए ।

समितिको साझेदार दलबाट एकएक जना प्रतिनिधि रहनेछन् । न्यूनतम् साझा कार्यक्रम तय गर्दा हरेक राजनीतिक दलका एजेन्डा समेट्नेबारे समेत छलफल भएको उनले बताए ।

आजको बैठकमा प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्ड, एमाले अध्यक्ष ओली, राष्ट्रिय स्वतन्त्र पार्टीका सभापति रवि लामिछाने र राप्रपा अध्यक्ष राजेन्द्र लिङ्देन सहभागी थिए ।

यसअघि नेकपा लगायत वाम नेतृत्वकाे सरकारका बेला पनि यस्तै निर्णय गरेर जनतामाझ लाेकप्रियता कमाउने खेलाे नचलाएका हाेइनन् ।

सरकारलाई ७ दलले समर्थन गरेपनि जसपा र नागरिक उन्मुक्ति पार्टी भने सरकारमा सहभागी भइसकेका छैनन् । सरकारमा सहभागी हुनुपहिले जसपाले नागरिक वितरण र नागरिक उन्मुक्तिले रेशम चौधरी लगायतलाइ टिकापुर घटनामा लगाइएका मुद्दा खारेजी र बन्दी रिहाइको सर्त राखेका छन् ।