पूर्वस्वीकृति नलिई शैक्षिक मेला गर्न बन्देज, अटेर गर्नेलाई कारबाही गरिने

१४ पुष, काठमाडौं । शैक्षिक मेला गर्ने आयोजकले शिक्षा, विज्ञान तथा प्रविधि मन्त्रालयबाट अनिवार्य रुपमा स्वीकृति लिनुपर्ने भएको छ ।मन्त्रालयको उच्च शिक्षा महाशाखा शैक्षिक परामर्श तथा प्रमाणीकरण शाखाले मन्त्रालयबाट स्वीकृति नलिई शैक्षिक मेला आयोजना नगर्न निर्देशन दिएको छ ।

केही संस्था, व्यवसायी र शैक्षिक परामर्शदाता संस्थाले स्वीकृति नलिई भटाभट शैक्षिक मेला आयोजना गरेको गुनासाहरू व्यापक बढेपछि मन्त्रालयले त्यसमा रोक लगाएको हो ।

स्वीकृति नलिई शैक्षिक मेला आयोजना गर्ने, अपुष्ट सूचना सामग्री राखी मेलाको प्रचार गर्ने गरेको पाइएको भन्दै मन्त्रालयले त्यस्तो नगर्न भनेको हो । सूचनापछि पनि बिना स्वीकृति गरेको पाइएमा कारवाही गरिने जनाइएको छ ।

शैक्षिक परामर्श सेवा तथा भाषा शिक्षणसम्बन्धी निर्देशिका, २०७३ मा स्वदेशी तथा विदेशी संस्थाले शैक्षिक मेला वा प्रदर्शनीको आयोजना गर्दा मन्त्रालयबाट स्वीकृति लिनुपर्ने व्यवस्था छ ।

मन्त्रालयबाट पूर्व स्वीकृति नलिई मेला वा कार्यक्रमसम्बन्धी कुनै मिडियाबाट प्रचारप्रसार नगर्न–नगराउन समेत निर्देशन दिएको छ ।