कांग्रेस प्रदेश १ संसदीय दल निर्वाचनमा ३ जनाको उम्मेदवारी दर्ता

१४ पुष, विराटनगर । नेपाली कांग्रेस प्रदेश १ संसदीय दलको निर्वाचनमा संस्थापन पक्षका दुईसहित तीन जनाले उम्मेदवारी दर्ता गराएका छन् । संस्थापन पक्षका देउवा पक्षीय नेता अमृत अर्याल र सिटौला पक्षका नेता उद्धव थापा र संस्थापनइतर पक्षबाट केदार कार्कीले उम्मेदवारी दर्ता गराएका छन् ।

दलको नेता दाबी गरिरहेका भीम पराजुली उद्धव थापाको समर्थक बसेका छन् । सिटौला पक्षबाट दुई जना हुने भएपछि उद्धव मात्रै अघि सरेका हुन्।

संस्थापन पक्षले एक जनामात्रै उम्मेदवार बनाउन गरेको प्रयास विफल भएपछि दुई जनाले नै उम्मेदवारी दर्ता गरेका हुन्। संसदीय दलमा शुक्रबार ९ देखि १० बजेसम्म विराटनगरमा निर्वाचन हुँदैछ।

अहिले प्रदेश सभाको प्रमुख प्रतिपक्षी दलको नेता हुन पाइने र भविष्यमा जुनसुकै बेला सरकारको नेतृत्वको अवसर आउने सम्भावना भएको भन्दै कांग्रेसभित्र तीव्र प्रतिष्पर्धाको अवस्था छ ।

९३ सदस्यीय प्रदेश सभाको दोस्रो ठूलो दल कांग्रेससँग जम्मा २९ सांसद छन् । विजयी हुन १५ मत आवश्यक पर्छ।