एमालेसँग पार्टी एकता प्रक्रिया अघि बढेको प्रचार आधारहीन : प्रवक्ता खतिवडा

१४ पुष, काठमाडौं । नेकपा (एकीकृत समाजवादी)का प्रवक्तासमेत रहेका उपहासचिव जगन्नाथ खतिवडाले कुनैपनि राजनीतिक दलसँग पार्टी एकता गर्ने प्रक्रियाअघि बढेको भन्ने प्रचार आधारहीन रहेको स्पष्ट पारेका छन् । बजार हल्लाको भ्रममा नपर्न पनि उनले आग्रह गरेका छन् ।

एमालेसँग पार्टी एकता हुन लागेको चर्चा चलिरहेका बेला बिहीबार एक वक्तव्य जारी गर्दै उनले कुनैपनि पार्टीसँग एकता प्रक्रिया अघि नबढेको बताएका हुन् ।

‘बजार हल्लाको भ्रममा नपरौँ । हाम्रो पार्टी नेकपा एकीकृत समाजवादी कुनै पार्टीसँग एकीकरण गर्ने गरी अगाडि बढेको छैन । कुनैपनि प्रकारका प्रायोजित प्रचारको भ्रममा परेर धारणा बनाउन हुँदैन’ उनले भनेका छन् ।

नेकपा (माओवादी केन्द्र)का अध्यक्ष पुष्पकमल दाहाल प्रचण्ड नेतृत्वको सरकारमा जाने कि नजाने भन्ने विषयमा छलफल मात्र भएको र निर्णय लिइनसकेको पनि उनले स्पष्ट पारेका छन् ।

पार्टीले सुद्धृढीकरणको योजना बनाइरहेको र पार्टी विस्तारका अभियानहरु कसरी अगाडि बढाउने भनेर विचार विमर्श चलिरहेको बताएका उनले स्थायी कमिटी, पोलिटब्युरो र केन्द्रीय कमिटीका बैठकहरु आयोजना गर्ने तयारी भइरहेको जानकारी दिए ।

सो पार्टीकी नेतृ रामकुमारी झाँक्रीले भने एक संचारमाध्यमसँगको अन्तर्वार्तामा पार्टी अध्यक्ष माधवकुमार नेपालले एमाले अध्यक्ष केपी शर्मा ओली जतिको दूरदर्शिता राख्न नसकेको तर्क गरेकी छन् ।