नेपाली कांग्रेस न खुम्चिएको छ, न कमजोर भएको छः डा. शेखर

१४ पुष, विराटनगर । नेपाली कांग्रेसका नेता डा. शेखर कोइरालाले पार्टी नेतृत्वले कमजोरी गर्दा शासकीय सत्ताबाट कांग्रेस विमुख भएपनि यसको आकारमा कुनै परिवर्तन नआएको बताएका छन् । उनले सत्ता गठबन्धन कायम रहन नसक्नुमा कांग्रेस नेतृत्वको कमजोरी मात्र नभएर माओवादीका अध्यक्ष पुष्पकमल दाहाल ‘प्रचण्ड’को अस्थिर राजनीति मूल कारक भएको बताएका छन् ।

विराटनगरस्थित कोइराला निवासमा बिहीबार प्रदेश सांसदहरुसँगको चियापान समारोहमा कोइरालाले नयाँ गठबन्धनलाई देशको स्थिरतामा ध्यान पुर्याउन सुझाव पनि दिएका छन् । उनले सरकारको नेतृत्व नयाँ गठबन्धनबाट भएपनि देशले राजनीतिक र आर्थिक स्थायित्व खोजेकाले यसमा विशेष ध्यान दिएर अगाडी बढुनुपर्ने बताए । कांग्रेस नेता कोइरालाले मुलुकको अर्थतन्त्र अत्यन्तै डमाडोल अवस्थामा रहेकाले अहिलेको सरकारले आर्थिक, राजनीतिक र सामाजिक स्थिरता दिनुपर्नेमा जोड दिए ।

उनले भने, ‘अहिलेको सरकारले राम्रो काम गरेर देशलाई अघि बढाएर समृद्धि ल्याउनुका साथै आर्थिक, सामाजिक र राजनीतिकलाई स्थिरता दिनुपर्छ । सन् २०२३ मा विश्वभरि नै आर्थिक संकट बढ्दै जाने अर्थविद्हरुको प्रक्षेपण रहेकाले त्यसको असर नेपालको आमसर्वसाधारण पर्नु स्वभाविक हो । त्यसैले अहिले आर्थिक क्षेत्रमा देखिएका अप्ठयारा र संकटलाई यसअघि पनि अर्थमन्त्री भइसकेका विष्णु पौडेलजीले समाधान गर्न सक्नुहुन्छ भन्ने विश्वास छ ।’

उनले अन्तिम घडिमा आएर पदका विषयमा कुरा नमिलेर गठबन्धन भाँडिनु दुखद भएको बताए । कोइरालाले नबनाउनु गठबन्धन बनाइसकेपछि यसलाई लामो समयसम्म अगाडि बढाउने सोचे भएपनि त्यो कांग्रेस नेतृत्वको कमजोरी र माओवादी केन्द्रका अध्यक्ष प्रचण्डका कारण हुन नसक्नु दुर्भाग्यपूर्ण भएको बताए । उनले माओवादी केन्द्रका अध्यक्ष प्रचण्ड सुरुमा नै प्रधानमन्त्री बन्न चाहेको विषय पार्टी आफुले नेतृत्वलाई पहिले नै जानकारी गराइसको बताए ।

गठबन्धन टुट्नुमा कांग्रेस नेतृत्वको कमजोरी रहेको भन्दै अब कांग्रेस प्रतिपक्षमा पुगेकाले सदन र सडक दुवै ठाउँबाट देश र जनताको हितमा काम कटिबद्ध भएर लाग्ने कोइरालाले बताए । सरकारमा नजाँदैमा कांग्रेस खुम्चियो र कमजोर भयो भन्ने मानसिकता कांग्रेसीहरुले त्याग्नुपर्ने उनको भनाई थियो । कोइरालाले कांग्रेस सुधार अन्तिम विन्दुबाट सुरु गर्नु पर्ने र यसरी सुधार गरेर ल्याउँदा समग्र पार्टीमा सुधार आउने उनले बताए ।

उनले कांग्रेसको अहिलेको अवस्थाबारे सबैले चिन्ता गर्नुपर्ने तर, आत्तिएर हामी सकियौ, कांग्रेस सकियो भनेर चिन्ता गर्नुपर्ने कुनै कारण नभएको भन्दै कसैलाई यो भावना नराख्न आग्रह गरे । कोइरालाले भने,‘कांग्रेसभित्र ठूलो शक्ति छ, त्यसलाई हामीले अघि बढाउँछौं । जहाँ गल्ती हुन्छ त्यहाँ गलत भनेर अघि बढ्ने आँट राखेर अघि बढ्छौं । कांग्रेस नेतृत्वको सरकारले फौजदारी अभियोगको विषयमा ल्याएको अध्यादेशको खुलेरै विरोध गरेकै हौं र अहिलेको सरकारले पनि कुनै गलत काम गर्यो भने त्यसको विरोधमा हामी हुन्छौं ।’