पूर्वप्रशासकीय अधिकृतसहित ३ जनविरुद्ध भष्ट्राचार मुद्दा

१४ पुष, काठमाडौं । अख्तियार दुरुपयोग अनुसन्धान आयोगले सर्लाहीको कविलासी नगरपालिका–८ स्थित निर्माणधीन रामजानकी मन्दिरको गलत बिल बनाइ रकम हिनामिना गरेको आरोपमा नगरपालिकाका तत्कालिन निमित्त प्रमुख प्रशासकीय अधिकृत र २ इञ्जिनियरविरूझ विशेष अदालतमा मुद्दा दायर भएकाे छ ।

तत्कालिन निमित्त प्रमुख प्रशासकीय अधिकृत श्याम किशोर राय, इन्जिनियर रामविनयप्रसाद यादव र सब इन्जिनियर उमेशकुमार दासविरुद्ध मुद्दा दायर भएकाे हाे ।

उनीहरूविरूद्ध परेको उजुरी अनुसन्धान गर्दा रामजानकी मन्दिर निर्माणमा फिल्डमा कम काम भएकोमा बढी काम भएको भनी नापी किताबमा मूल्यांककन गरी चढाएको तथा ठेक्का बिल र कार्यसम्पन्न प्रतिवेदन तयार गरी सिफारिससमेत गरी फिल्डमा वास्तविक कार्यभन्दा बढी मूल्यांकन गराई भुक्तानी र कार्य सम्झौता विपरीत कार्यसम्पन्न भएको भनी ९७ हजार आठ सय ४० रुपैयाँ बढी भुक्तानी भएको फेला परेको अख्तिारको भनाइ छ ।

उनीहरूलाई कानुनबमोजिमको कैद र जरिवानाको सजाय मागदाबी गर्दै आज बिशेष अदालत, काठमाडौंमा आयोगले आरोपपत्रसहित मुद्दा दायर गरेको हो ।