३५ तोला सुनसहित पक्राउ परेका डीएसपी ठगबहादुर केसी निलम्बित

१४ पुष, काठमाडौं । सुन व्यापारीसँग नगद घुस लिएको आरोपमा सीआईबीको टोलीको फन्दामा परेका रुपन्देहीको इलाका प्रहरी कार्यालय बुटवलका प्रहरी नायब उपरीक्षक (डीएसपी) ठगबहादुर केसीलाई निलम्बन गरिएको छ ।

प्रहरी प्रधान कार्यालयको सिफारिसमा गृह मन्त्रालयले केसीलाई बिहीबार निलम्बन गरेको हो । केसीले ब्यापारीबाट ३५ तोला सुन बरामद गरी मुद्दा प्रक्रिया अघि नबढाई पैसाको बार्गेनिङ गरेको सूचनाका आधारमा केन्द्रीय अनुसन्धान ब्यूरोबाट खटिएको टोलीले उनलाई पक्राउ गरेको थियो ।

पक्राउपछि गरिएको खानतलासीमा उनको निवासबाट ३५ तोला सुन, ८ लाख ५० हजार रूपैयाँ, ९ लाख ५० हजार रूपैयाँको खिम जिसीको नाममा रहेको चेक बरामद भएको थियो ।

छानबिनका लागि हिरासतमा राखिएका उनलाई थप अनुसन्धान आवश्यक देखिएपछि निलम्बन गरिएको स्रोतले जनायो । बुटवलबाट कास्कीमा सरुव भएका उनी रमना पत्र बुझेर जाने क्रममा रहेकै बेला पक्राउ परेका थिए ।