कांग्रेस मधेश प्रदेश दलको नेतामा कृष्ण यादव निर्वाचित

१४ पुष, काठमाडौं । नेपाली कांग्रेस मधेश प्रदेश संसदीय दलको नेतामा कृष्णदेव यादव निर्वाचित भएका छन् । बिहीबार भएको दलको नेताको निर्वाचनमा उनले रामसरोज यादवलाई पराजित गरेका हुन् ।

मधेश प्रदेशमा कांग्रेसका २२ सांसद छन् । कृष्ण यादवले १८ र रामसरोजले चार मत पाए । कृष्णदेव संस्थापन पक्षका नेता हुन् । रौतहटका उनी कांग्रेस मधेश प्रदेशको सभापतिसमेत हुन् ।

धनुषाका रामसरोज विमलेन्द्र निधि निकट नेता हुन् । दलको नेता निर्वाचित भएपछि मधेस प्रदेशमा सरकार बनाउन अन्य दलसँग छलफल गर्ने यादवले बताएका छन् । मधेश प्रदेशमा कुनै दलको स्पष्ट बहुमत छैन । एमालेसँग २३ सांसद छन् ।