नागरिकतासम्बन्धी मुद्दा सम्बाेधन नभएसम्म लाेसपाले सरकारलाई समर्थन नगर्ने

१५ पुष, काठमाडौं । लोकतान्त्रिक समाजवादी पार्टी नेपाल (लोसपा) प्रचण्ड नेतृत्वको सरकारमा जाने वा नजानेबारे अझै निर्णय लिन सकेको छैन ।

सरकारलाई समर्थन गर्न र सरकारमा सहभागी हुन एमाले र माओवादी केन्द्र लगायत सरकारमा सहभागी दलका नेताहरुले बारम्बार प्रयास गरेपनि लोसपाले कुनै निर्णय लिन नसकेको हो ।

तराई आन्दोलनका क्रममा सरकारले लगाएको झुटा मुद्दा खारेज र पीडितलाई न्याय र क्षतिपूर्ति दिनुपर्ने, नागरिकताबाट बञ्चितलाई तत्काल नागरिकता तिवरण गर्नुपर्ने माग सम्बोधनबारे सरकारले ठोस कदम नचालेसम्म सरकारमा नजाने योजनाdf लोसपा रहेको छ । यस मानेमा लोसपा ‘पर्ख र हेर’को अवस्था रहेको बुझिन्छ ।

सरकारले विश्वास मत दिने अघिल्लो दिन मात्र के गर्ने ? भन्नेबारे निर्णय लिने प्रतिनिधिसभा सदस्य .सांसद) सर्वेन्द्रनाथ शुक्लाले बताए । पार्टीले उठाएको मुद्दा र एजेण्डा कार्यान्वयन गर्ने प्रतिवद्धता आएको खण्डमा मात्र सरकारलाई समर्थन दिनेबारे सोच्न सकिने उनको भनाइ छ । सरकारमा जाने वा नजाने विषयबारे पार्टीमा औपचारिक रूपमा छलपफल नै नभएकाे एक नेताले बताए ।

माओवादी केन्द्रका अध्यक्ष प्रचण्ड नेतृत्वको सरकारलाई एमाले, रास्वपा, राप्रपा, जसपा, जनमत पार्टी र नागरिक उन्मुक्ति दलसहित ७ दलले समर्थन गरेका छन् ।

गएको मंसिर ४ मा भएको प्रतिनिधिसभा र प्रदेशसभा निर्वाचनमा लोसपा कांग्रेस नेतृत्वमा माओवादी केन्द्र, एकीकृत समाजवादी, राजमोसहित गठबन्धनमा आवद्ध भएर चुनाव लडेको थियो । चुनावको परिणाम आएपछि कांग्रेसको साथ छाडेर एमालेको समर्थनमा प्रचण्डले आफ्नो नेतृत्वमा सरकार गठन गरेपछि लोसपा मौन बस्दै आएको छ । लाेसपासँग ४ सांसद छन् ।