सिके राउत स्थानीयसँगको भेटघाटमा (तस्बिरहरु)

१५ पुष, काठमाडौं । नेकपा (माओवादी केन्द्र)का अध्यष प्रचण्ड नेतृत्वको सरकारमा सहभागी भएका जनमत पार्टीका अध्यक्ष समेत रहेका प्रतिनिधिसभाका सांसद सिके राउत गृह जिल्लामा पुगेर स्थानीयसँग भेटघाटमा लागेका छन् ।

सरकारमा सहभागी भएसँगै काठमाडौंमा बस्न डेराको खोजी गरिरहेका राउत सप्तरीमा आफ्नो निर्वाचन क्षेत्र पुगेका हुन् । उनी त्यहाँ मतदातालाई धन्यवाद दिँदै उनीहरुबाट बधाई शुभकामना लिने काममा व्यस्त भएका छन् ।

भेटघाट र भलाकुसारीको दर्जनौं तस्बिर उनले सामाजिक सञ्जालमा राखेका छन् । जनताको दुःखबारे बुझ्ने काम भइरहेको उनले संजालमा लेखेका छन् । तराई केन्द्रित रहेर विखण्डकारीको भूमिकामा विखण्डनको नारासहित भूमिगत राजनीति गर्दै आइरहेका बेला तत्कालीन केपी शर्मा ओली नेतृत्वको सरकारसँग सम्झौता गरेर खुला राजनीतिमा आएका थिए । आएसँगै जनमत पार्टी गठन गरेर गएको मंसिर ४ मा सम्पन्न आमनिर्वाचनमा भाग लिई उम्मेदवार दिएका उनी भारी मतसहित संघीय सांसदमा निर्वाचित भएका हुन् ।

निर्वाचनमा उनले तराई क्षेत्रमा व्याप्त मिटर ब्याजपीडित र चिनी मिलबाट पीडित उखु किसानलाई न्याय दिने एजेण्डा लिएर प्रचारमा उत्रेका थिए । सरकारमा उनले उद्योग मन्त्रालय लिएका छन् । मन्त्रीमा पार्टीका उपाध्यक्ष अब्दुल खानलाई पठाइएको छ ।