प्रधानमन्त्री र निर्वाचन आयोग पदाधिकारीबीच राष्ट्रपति र उपराष्ट्रपति चुनावबारे छलफल

१८ पुष, काठमाडाैं । प्रधानमन्त्री पुष्पकमल दाहाल ‘प्रचण्ड’ र निर्वाचन आयोगका पदाधिकारीहरूबीच छलफल भएको छ ।

बालुवाटारस्थित प्रधानमन्त्रीको सरकारी निवासमा सोमबार पुगेका निर्वाचन आयोगका पदाधिकारीसँग प्रधानमन्त्री प्रचण्डले गत मंसिरमा सम्पन्न प्रदेशसभा र प्रतिनिधिसभाा सदस्य निर्वाचनको समीक्षा गर्दै राष्ट्रपति र उपराष्ट्रपति चयनका लागि गरिने निर्वाचनको विषयमा छलफल भएको छ ।

सरकारको समर्थनमा आयोगले राष्ट्रपति निर्वाचनको मिति तोक्ने संवैधानिक व्यवस्था रहेको छ । सोही विषयमा छलफल गर्न आयोगका पदाधिकारी बालुवाटार पुगेका हुन् ।  प्रमुख निर्वाचन आयुक्त दिनेशकुमार थपलियासहित आयुक्तहरू बालुवाटार पुगेर छलफल गरेका हुन् । बैठकमा प्रमुख आयुक्त  थपलियाले आयोगको कामकार्वाही र निर्वाचन प्रक्रियाबारे जानकारी गराएका थिए ।

छलफलमा प्रधानमन्त्री प्रचण्डसहित उपप्रधान तथा अर्थमन्त्री विष्णु पौडेल, उपप्रधान तथा गृहमन्त्री रवि लामिछाने पनि सहभागी थिए ।

वरियताको क्रममा आफू प्रधानमन्त्रीभन्दा ठीक पछि हुनुपर्ने भन्दै असन्तुष्ट जनाउँदै आइरहेका उप्रधानमन्त्री तथा भौतिक पूर्वाधार मन्त्री नारायणकाजी श्रेष्ठ भने छलफलमा सहभागी भएनन् ।