खुकुरी प्रहार गरी भारतीय कार चढेर भागेका ४ जना पक्राउ

१८ पुष, काठमाडौं । आइतबार दिउँसो खुकरी प्रहार गरी भारतीय कारमा चढेर फरार भएका चार जनालाई प्रहरीले पक्राउ गरेको छ । उनीहरुले दिउँसो २ बजेतिर नेपालगन्ज उपमहानगरपालिका–४ गणेशपुरस्थित वडा नम्बर १२ का अनुराग शाह, जानकी गाउँपालिका–३ का उज्वल शाह र नेपालगन्ज–४ का सुभम जंग शाहलाई खुकुरी प्रहार गरी फरार भएका थिए ।

प्रहारपछि उनीहरु यूपी ३२ इयू ८६१६ नम्बरको भारतीय कार चढेर भागेका थिए । नाका सिल्ड गरी खोजी गर्ने क्रममा उनीहरुलाई बाँकेको डुढुवा गाउँपालिका–३ स्थित बनकट्टीबाट पक्राउ गरिएको हो ।

उनीहरुले प्रयोग गरेको वनकट्टीबाट राम पुरुवा जाने बाटो दक्षिणतर्फ खेतबाट बरामद भएको थियो । पछि खोजीका क्रममा अभियुक्तहरुलाई पक्राउ गर्न प्रहरी सफल भएको थियो ।

पक्राउ पर्नेहरुमा नेपालगन्ज उपममहानगरपालिका–१८ का २९ वर्षीय विनय भण्डारी, वडा नम्बर ६ का ३१ वर्षीय प्रकाश थापा, राप्ती सोनारी गाउँपालिका–२ का ३१ वर्षीय नारायण डाँगी र वैजनाथ गाउँपालिका–५ का २९ वर्षीय प्रकाश रसाइली रहेका छन् । अभियुक्त चारै जनालाई प्रहरीले सार्वजनिक गरेको छ ।

उनीहरुको साथबाट प्रहार घटनामा प्रयोग भएका दुई थान कुखुरी नेपालगन्ज उपमहानगरपालिका–५ फुल्टेक्रास्थित सडक बाटो नजिक बुट्यान झाँडीमा फेला पारी बरामद गरी अनुसन्धान भइरहेको प्रहरीले जनाएको छ ।

प्रहारका घाइतेहरुलाई नेपालगन्ज मेडिकल कलेजमा उपचार गराइरहेको बताइएको छ ।