उत्तरखण्डमा कैलालीका एकै परिवारका ३ जनाको निस्सासिएर मृत्यु

१८ पुष, धनगढी । ज्याला मजदुरी गर्न भारतको उत्तरखण्ड पुगेका कैलाली गौरीगंगाा नगरपालिकाका एकै परिवारका ३ सदस्य निस्सासिएर ज्यान गएको छ ।

आइतबार राति एउटै कोठामा सुतेका उनीहरुको निस्सासिएर ज्यान गएको हो । ज्यान गुमाउनेहरुमा गौरीगंगा नगरपालिका–१ का अन्दाजी ३६ वर्षीय चन्द्रबहादुर भुल, उनकी ३५ वर्षीया श्रीमती कुमारी भुल र २ वर्षीया छोरी रहेका छन् ।

कामका लागि उनीहरु उत्तराखण्डको मेरठमा बस्दै आएका र न्यानोका लागि उनीहरू कोठामा रेलमा प्रयोग हुने कोइला बालेर सुतेको अवस्थामा मृत फेला परेका हुन् ।

मृत्यु घटनाको पुष्टि गौरीगंगा नगरपालिका १ का वडा अध्यक्ष डबलबहादुर दियाकोटी बोहराले गरे । भुल दम्पती डेढ वर्षअघि एक छोरीलाई लिएर घरबाट निस्केको उनले बताए ।

शवको पोस्टमर्टम भइसकेको र शवलाई घर ल्याउने प्रक्रिया भइरहेको अध्यक्ष बोहराले बताए । मृतक दम्पतीका घरमा पनि दुई छोरी र एक छोरा छन् ।