मुख्यमन्त्रीकै गाउँमा बोक्सीको आरोपमा दलित महिलालाई निर्घात कुटपिट

१९ पुष, काठमाडौं । मधेश प्रशका मुख्यमन्त्री लालबाबु राउतको पर्सा जगरनाथपुर गाउँपालिकामा एक दलित महिलामाथि बोक्सीको आरोपमा निर्घात कुटपिट भएको छ ।

जगरनाथपुर गाउँपालिका–३ खलुचडीका ६० वर्षीय दलित महिला सुदामा देवी चमईनलाई बोक्सीको आरोपमा छिमेकी मिलेर कुटपिट गरेका छन् । गम्भीर घाइते सुदामादेवीको वीरगञ्ज स्थित नारायणी अस्पतालमा उपचार भइरहेको छ ।

घाइतेको टाउको, घाँटी लगायत शरीरको विभिन्न भागमा गहिरो चोट लागेको उपचारमा संलग्न चिकित्सकहरुले बताएका छन् । आइतवार साँझ घरमै चिसो छल्न घुर ताप्दै गरेको अवस्थमा नबी आलम राउत गद्दी, रैफुल मास्टर राउत गद्दी, बासुदेव महरा चमार र सुरेश महरा चमार लगायतले कुटपिट गरेको पीडित परिवारले जनाएको छ ।

घाइते सुदामाको छोरा प्रभु महराका अनुसार अचानक छिमेकका चार पाँच जना मिलेर बोक्सीको आरोपमा कपाल समातेर बाँसको भाटाले हिर्काएर लछापछार गर्दै कुटपिट गरेका हुन् । घाइतेको दाँतमा समेत गम्भीर चोट लागेको छ । मल मूत्र खुवाउने प्रयास गरिएको उनले बताए । कुटपिटमा संलग्नलाई तत्काल पक्राउ गरी कारबाही गर्न उनले माग गरे ।

‘बोक्सा, बोक्सी’ शब्द प्रयोग गरी गाली गलौज गर्न र कुटपिट गर्न कानूनले निषेध गरे पनि छिमेकीहरुले सुदामालाई बाटो हिँडदाधसमेत होच्याउने गरिएको छिमेकीहरुले बताए ।