नेपाल टी-२० लिगमा फिक्सिङको आशंका, कमेन्टेटर सचिनले छाडे लिग

१९ पुष, काठमाडौं । कीर्तिपुरस्थित त्रिवि मैदानमा जारी नेपाल टी-२० लिगमा ‘फिक्सिङ’को आशंका गरिएको छ । कमेन्टेटर सचिन तिमल्सेनाले लिगमा ‘स्पट फिक्सिङ’ भएको बताउँदै गिल छाडेका छन् ।

उनले लिग छाड्नुका पछाडिका कारणबारे भिडियोमा सविस्तार विवरण पेश गर्दै आफूले देशको लिग मात्र नभई क्रिकेट खेललाई स्वच्छ र पारदर्शीताका लागि लिग छाडेका बताएका छन् ।

जारी टी-२० लिगमा ६ टिमको सहभागिता छ। लुम्बिनी अल स्टार्स, जनकपुर रोयल्स, काठमाडौं नाइट्स, पोखरा एभेन्जर्स, विराटनगर सुपरकिंग्स र फार वेस्ट युनाइटेडले भाग लिएको लिगमा अहिले दोस्रो चरणका खेल भइरहेका छन् । उनले विदेशीलाई लिग आयोजनाकोा जिम्मा दिएबाट आफूहरुलाई शंका लागेको बताउँदै अहिले खेलमा नेपाल पक्षबाट भइरहेको खेलले दोस्रो चरणको खेल लिग फिक्सरको हातमा गएको उल्लेख गरेका छन् ।

लिगलाई नेपाल क्रिकेट संघ (क्यान) ले भारतीय कम्पनी सेभेन थ्री स्पोर्ट्सलाई आयोजनाको जिम्मा दिएको छ ।

क्रिकेटलाई गलत तरिकाले प्रयोग गरेर फिक्सिङ गराउने क्रियाकलाप आफूले देखेको उनले बताए । उनले बोलेको कुरालाई सामाजिक सञ्जालमा भिडिओ पोस्ट गरेका छन् । उनले भिडियोमा भनेका छन्, ‘आजकाल म्याच फिक्सिङ हुँदैन स्पट फिक्सिङ हुन्छ। नतिजामा असर गर्दैन । तर खेलको दौरानमा केही त्यस्तो काम हुनेछ, जुन तपाईंलाई पहिले नै गर्न भनिएको हुन्छ।’

‘लिगमा हदैसम्मको बदनियत देखिएको बताउँदै उनले ‘नेपाल टि-२० फिक्सरको हातमा गएको छ । यसले नेपाली क्रिकेटलाई बिगार्छ। कमन्ट्री गर्दा मैले हरेक बल नियालेर हेरेकाले यस्तो भनिरहेको छु,’ भनेका छन् ।

‘अब त आयोजक पनि गायब भएछन् । आजबाट यो लिग मा ब्रोड्कास्टर या कमेन्टेटरको रुपमा मेरो कुनै संलग्नता रहने छैन’ उनले मंगलबार आफ्नाे फेसबुक पेजमा लेखेका छन् । उनले जारी आईपीएलको नेपाली स्वरुप भएको उनको भनाइ छ । उनले नवाै दिनसम्म कमेन्टेटरकाे भूमिका निर्वाह गरेका थिए ।

आफूलाई लागेको र भोगेको कुरा अहिले राखिनँ भने नेपालीे क्रिकेटलाई नै अन्याय हुने ठानेर आश्चर्यजनक तर वास्तविकता बाहिर ल्याएको बताएका छन् । आफूले पहिलेपहिले लिगमा फिक्सिङ हुने गरेको सुनिएको तर अहिले देखेको बताए ।