कांग्रेस केन्द्रीय समितिको बैठक स्थगित, माहोल मिलाएर मात्र फेस गर्ने देउवाको रणनीति

२० पुस, काठमाडौं । तयारी नपुगेको भन्दै पुष २२ गते बोलाइएको नेपाली कांग्रेसको केन्द्रीय समितिको बैठक सारिएको छ । २२ पुस शुक्रबारका लागि बोलाइएको बैठकमा पार्टीबारे उठ्ने प्रश्नको फेस गर्न असहज अवस्था देखिएपछि पार्टी सभापति शेरबहादुर देउवाले बैठक सार्न लगाएको बताइएको छ ।

केन्द्रीय समिति बैठक २८ पुसको दिउँसो १ बजे बस्ने गरी सारिएको कांग्रेस केन्द्रीय कार्यालयका मुख्यसचिव कृष्णप्रसाद पौडेलले जानकारी दिए । केन्द्रीय समिति बैठक मूलरुपमा गत निर्वाचनको समीक्षा गर्न बोलाइएको भएपनि पछिल्लो समयमा आएर कांग्रसभित्र अकै परिस्थिति सिर्जना भएको छ । सभापति देउवाले व्यक्तिगत हठ राख्दा गठबन्धन भाँडिएको र कांग्रेसलाई शुन्य अवस्थामा पुर्याएको भन्दै नेतृत्वको आत्मसमीक्षासहित नीति र विषेश महाधिवेशन बोलाउनु पर्ने आवाज उठेको छ ।

मंसिर ४ मा सम्पन्न भएको प्रतिनिधिसभा र प्रदेशसभा निर्वाचनपछि कांग्रेसको केन्द्रीय समिति बैठक बसेको छैन । कांग्रेस सत्ता र शक्तिबाट बिमूख भएपछि संस्थापन र इतरसमूहबीच चर्को विवाद छ । सरकार गठनबारे अन्तिमसम्म पनि पार्टीका पदाधिकारीसँग छलफल नगरी सभापति देउवाले प्रधानमन्त्री नछाड्ने अडान लिँदा पार्टीले सर्वश्व गुमाउन परेको भन्दै महामन्त्रीद्वयसहित कोइराला समूहले तत्काल नीति महाधिवेशनको माग गरेको छ । यसै विषयमा जानकारी गराउन कांग्रेसले आज पत्रकार सम्मेलन समेत गर्दैछ ।

पार्टी विधानमा ६ महिनाभित्र नीति महाधिवेशन गर्ने भनिएपछि त्यसलाई संस्थापन समूहले टार्दै आएको छ । उपसभापति पूर्णबहादुर  उपसभापतिलाई खड्का नीति, अनुसन्धान तथा प्रतिष्ठानको प्रमुख तोकिएपछि निर्वाचन लगायतका कारण देखाएर समितिलाई समेत पूर्ण बनाइएको छैन् । विधानमै उपसभापति उक्त पदको प्रमुख हुने व्यवस्था भएकाले सभापति देउवाले उक्त पदमा खड्कालाई मनोनित गरेका थिए । खड्काको नेतृत्वमा नीति, अनुसन्धान तथा प्रतिष्ठान बनेको पनि एक वर्ष हुन लागेको छ ।

इतरसमूहले नीति महाधिवेशनको माग गरेपछि आफु उपस्थित हुँदा बैठकलाई सहज बनाउने वतावरण मिलाउन देउवाले बैठक सार्न लगाएको एक नेताले बताए । २२ गतेदेखि कांग्रेसको केन्द्रीय समितिको बैठक डाकिएकाले नीति महाधिवेशनका विषयमा छलफल हुने नेताहरुको आशा थियो । सभापति देउवाले भने बैठकमा छलफलका एजेण्डामा यो विषय समावेश नगराएको बताइएको छ । नेपालबहससँगको कुराकानीमा कांग्रेस इतरसमूहका एक नेताले भने, कांग्रेसमा नीति महाधिवेशन नयाँ राजनीतिक अभ्यास हो । अन्योलमा रहेको नीति महाधिवेशन हुन सकेमा कांग्रेसमा नयाँ प्रयोगको प्रारम्भ पनि हुन्छ ।’

पहिलोपटक नीति महाधिवेशन गर्न लागिएकाले कुन विधि अपनाउने भन्नेमा दुबै समूह अन्योलमा देखिएका छन् । नीति महाधिवेशन राख्दा यसकै प्रतिनिधि मात्र सहभागी गराउने वा छुट्टै विधि अवलम्बन गर्ने भन्नेमा हालसम्म छलफल भएको छैन । केन्द्रीय समितिको बैठकले नै यसबारे निर्णय लिनुपर्ने अवस्था छ । नीति महाधिवेशनको औचित्य माथि समेत पार्टी भित्रै प्रश्न उठाइएको छ । नीति र नेतृत्व छुट्याउने विधिप्रति केही केन्द्रीय सदस्यले असन्तुष्टि पनि जनाएका छन् ।

प्रतिनिधिसभा निर्वाचनको परिणामबाट सबैभन्दा ठूलो दल भएर पनि नेपाली कांग्रेस प्रतिपक्ष बन्न पुग्दा पार्टीभित्र यतिबेला गम्भीर असन्तुष्टि, आक्रोश र उदासी छाएको र त्यो अस्वभाविक नभएको महामन्त्रीद्वयको भनाइ थियो । यसमा संस्थापन पक्षले असहमति जनाएको छ । दुवै पक्षको आफै तर्क र अडान रहेकाले कांग्रेसले गम्भीर आत्मसमीक्षा र आत्ममूल्यांकन गर्दै सुविचारित ढंगबाट अबको बाटो तय गर्नेमा आशंका देखिएको छ ।