उपप्रधानमन्त्री रविलाई घुमुवा आवश्यकता, दुवै प्रहरीबाट मागे विवरण

२० पुष, काठमाडौं । निर्देशनमन्त्रीको उपाधि पाएका उपप्रधान तथा गृहमन्त्री रवि लामिछानेले घुमुवा प्रहरीको विवरण मागेका छन् । नेपाल प्रहरी र सशस्त्र प्रहरी बल नेपाल मातहतका सादा पोशाक (घुमुवा) विवरण गृह मन्त्रालयमा पठाउन निर्देशन दिएका हुन् ।

नेपाल प्रहरीले विशेष व्यूरो र सशस्त्र प्रहरी इन्टेलीजेन्स व्यूरोको रुपमा कार्यरत रहेका प्रहरीलाई घुमुवा प्रहरी भनिन्छ । यसबाहेक कार्यालय प्रमुखले पनि सुचना संकलनका लागि घुमुवा प्रहरी राख्ने चलन रहेको छ । कतिपय सन्दर्भमा घुमुवा प्रहरीले आर्थिक चलखेल गरेको भन्दै विभागमा उजुरी पर्ने अवस्थामा उनीहरुलाई कारवाही गरिएको हुन्छ । तर यसपटक गृह मन्त्रालयले घुमुवा प्रहरीको विवरण मागेपछि भने दुवै प्रहरीलाई संकट परेको छ ।

‘कतिपय काममा गएका प्रहरीलाई घुमुवा भन्ने चलन छ तर उनीहरुको विवरण हामीले संगठनमा चुस्तदुरुस्त राखेका हुन्छौ अब नाम दिनुपर्ने अवस्था आएमा उनीहरुले मात्र होइन भावी दिनमा अरुले पनि काम गर्न मान्दैनन’, प्रहरी प्रधान कार्यालयका एक अधिकारीले भने । घुमुवाको रुपमा परिचालित जनशक्तिको विवरण मागेका छन् । गृह मन्त्रालयले ती दुबै प्रहरी संगठनलाई हिजो लेखेको पत्रमा सादा पोशाकमा परिचालित प्रहरी कर्मचारीहरुको संख्या तीन दिनभित्र उपलब्ध गराउन निर्देशन दिइएको छ ।

‘नेपाल प्रहरी, सशस्त्र प्रहरी बल नेपाल अन्तर्गत सादा पोशाक (घुमुवा) को रूपमा परिचालित प्रहरी कर्मचारीहरू के कति संख्यामा परिचालित छन् ? यसरी खटाइएका प्रहरीहरू मापदण्डबमोजिम परिचालित हुन् वा होइनन् ?’

गृहमन्त्रीले त्यस्ता घुमुवाको हालको अवस्था, खटिएका प्रहरीहरूको अवधिदेखि आधिकारिक रुपमा खटाइएका हुन् वा होइनन् ? भन्ने विषयसमेत पत्रमा उल्लेख गर्न लगाएका हुन्’, मन्त्रालयले जारी गरेको पत्रमा भनिएको छ । साथै सो पत्रमा मन्त्रिस्तरिय निर्णय गरिएको भन्दै सबै विवरण पठाउन आग्रह गरिएको छ ।

‘आलोपालो बदलीको व्यवस्था के छ ? साथै कसको मातहतमा कसरी खटाईंदै आएको छ ? संघ, प्रदेश र जिल्लागत रूपमा उल्लिखित विवरणहरू तीन दिनभित्र उपलब्ध गराईदिनु हुन,’ सो पत्रमा भनिएको छ । घुमुवाका कारण दुवै प्रहरी संगठन बद्नाम भएको भन्दै सो विवरण मागिएको स्रोतले जनाएको छ ।