कांग्रेस सुदूरपश्चिम संसदीय दलमा शाह निर्विरोध

२० पुष, धनगढी । नेपाली कांग्रेस सुदूरपश्चिम प्रदेश संसदीय दलको नेतामा कमलबहादुर शाह निर्विरोध निर्वाचित भएका छन् । उमेदवारी दर्ताको समयसम्म उनीबाहेक कसैको उमेदवारी नपरेपछि निर्विरोध निर्वाचित भएका हुन् ।

शाहको प्रस्तावक बहादुरसिंह थापा र समर्थक प्रकाश देउवा रहेका थिए । उनी कैलाली निर्वाचन क्षेत्र नम्बर–२ ‘क’बाट प्रदेशसभा सदस्यमा निर्वाचित भएका थिए । कांंग्रेस सुदूरपश्चिम दलको नेताका लागि बहादुरसिंह थापा, दिवानसिंह विष्ट, मेघराज खड्का, प्रकाश देउवासहित सातजनाले आकांक्षा राखेका थिए ।

मंगलबार बसेको प्रदेश पदाधिकारीको बैठकबाट दलको नेताका आकांक्षीहरूलाई सर्वसम्मत निर्णय गर्न सुझाव दिइएको थियो । तर, सहमति नजुटेपछि प्रदेश उपसभापति लोकराज अवस्थीको संयोजकत्वमा निर्वाचन समिति बनाइएको थियो ।