भेला रोकेर कोइराला समूहका शीर्ष नेताहरु आन्तरिक छलफलमा

२१ पुष, काठमाडौं । केन्द्रीय समितिको बैठक सरेको भन्दै नेपाली कांग्रेसको संस्थापन इतरसमुहले बिहीबारका लागि बोलाएको आफु पक्षीय भेला स्थगित गर्दै शीर्ष नेताहरुबीच छलफल गर्दैछ । कांग्रेस केन्द्रीय समिति बैठक आगामी २८ पुषमा सारिएको छ ।

२२ पुसमा बोलाइएको केन्द्रीय समिति बैठक प्रतिनिधिसभा बैठक बस्ने भएको र विश्वासको मतका विषयमा संसदीय दल बैठक बस्नुपर्ने भन्दै २८ पुषमा बैठक सारिएपछि कोइराला समुहले पनि भेला सारेर शीर्ष नेताको छलफल राखेको हो ।

आगामी केन्द्रीय कार्यसमिति बैठकका लागि रणनीति बनाउन नेता कोइरालाले आफ्नो समूहको भेला बोलाएको थियो । भेला सारिए पनि शीर्ष नेताबीच छलफल हुने कांग्रेस युवा नेता रन्जित कर्णले जानकार दिए । पार्टी नेतृत्वले समयमै सुझबुझ पुर्याउन नसक्दा सत्ताबाट बाहिरिनुपरेको भन्दै कांग्रेसमा तीव्र असन्तुष्टि बढेको छ ।

संस्थापन इतर समूहले सभापति शेरबहादुर देउवालाई सत्ताबाट बाहिरिनुपरेको आरोप डा.शेखर कोइराला–गगन थापा समूहले लगाउँदै आएको छ । कोइराला समूहका नेताहरुले गठबन्धन टुटेको तथा चुनावी समीक्षा र केन्द्रीय समिति बैठकमा प्रस्तुत गर्ने एजेन्डाबारे छलफल गर्ने बुझिएको छ ।

नयाँ सत्ता समीकरण बनेपछि यसअघि नै इतर समूहका नेताहरु शेखर कोइराला, उपसभापति धनराज गुरुङ, महामन्त्री गगन थापा, सहमहामन्त्रीद्वय जीवन परियार र बद्री पाण्डे, नेताहरू अर्जुननरसिंह केसी, चन्द्र भण्डारी, मिनेन्द्र रिजाल, बलबहादुर केसी, रामकृष्ण यादव, सरिता प्रसाईंलगायत बसेर छलफल गर्ने बताइएको छ ।