घट्यो हवाई भाडा, सबैभन्दा बढी धनगढी उडानमा घटाइयाे (भाडा दरसहित)

२५ पुष, काठमाडौं । सरकारले आन्तरिकतर्फ इन्धनको मूल्य घटाएसँगै आन्तरिक हवाई भाडा पनि घटेको छ । नयाँ भाडा दर अनुसार काठमाडौंबाट धनगढी अब ८८५ रुपैयाँ कम तिरे पुग्ने भएको छ । आन्तरिकतर्फ सबै रुटमा नयाँ भाडा पुष २७ अर्थात बुधबारबाट मात्र लागू हुने जनाइएको छ ।

यसअघि यो रुटमा यात्रुले हवाई इन्धनका लागि मात्र ८ हजार ३९५ रुपैयाँ तिर्दैै आएका थिए । धनगढीको अधिकतम भाडा पनि १६ हजार १४० रुपैयाँमा झरेको वायुसेवा सञ्चालक संघले जनाएकाे छ ।

काठमाडौंबाट हुने माउन्टेन फ्लाइटमा ६८५ रुर्पैयाँ भाडा घटेको छ । अब माउन्टेन फ्लाइटको अधिकतम भाडा १४ हजार २०५ रुपैयाँ कायम भएको छ ।

विराटनगरलाई ४८५, जनकपुरका लागि २६०, भरतपुरका लागि २१५, पोखराका लागि ३२० कम तिरे पुग्नेछ  ।काठमाडौंबाट भैरहवाका लागि ४१०, नेपालगन्जमा ६५५, तुम्लिङटारका लागि ३७०, सिमराका लागि १८०, सुर्खेतका लागि ६९० र राजविराजका लागि ४११ रुपैयाँ भाडा कम भएको छ ।

नेपाल आयल निगमले सोमबार आन्तरिक उडानको इन्धनमा प्रतिलिटर २० रुपैयाँले मूल्य घटाएको थियो ।