संसद सुशासन र समृद्धिका पक्षमा एक हुनुपर्छः प्रधानमन्त्री प्रचण्ड

२५ पुष, काठमाडौं । प्रधानमन्त्री पुष्पकमल दाहाल प्रचण्डले संसद जनतालाई सुशासन दिने र आर्थिक समृद्धिका विषयमा सिंगो संसद एक भएर लड्नुपर्ने बताएा छन् । उनले प्रतिनिधिसभाको अबको कार्यकाल सुशासन र समृद्धिका लागि केन्द्रित बनाउन आफु सदैव प्रयासरत रहेने पनि बताएका छन् ।

प्रतिनिधिसभाको पहिलो बैठकलाई सम्बोधन गर्दै प्रचण्डले संसद्लाई प्रभावकारी रूपमा अगाडि बढाउनुपर्ने बताएका हुन् । प्रधानमन्त्री प्रचण्डले संसद् आफूहरूको परीक्षाको केन्द्र भएको बताए । उनले जनताले असाधारण संकल्पको अपेक्षा गरेको बताउँदै यो संसद् आफूहरूको परीक्षाको केन्द्र भएको दावी गरे ।

प्रतिनिधिसभाको सोमबारबाट सुरु भएको पहिलो बैठकलाई सम्बोधन गर्दै प्रधानमन्त्री दाहालले भने, ’यो संसद्को अर्जुनदृष्टि सुशासन र समृद्धि हुनेछ ।’ संसद्मा लोकतान्त्रिक अभ्यासको वातावरण हुनुपर्ने उनको भनाइ थियो । संसद्मा उत्तेजनाभन्दा पनि समझदारीमा अगाडि बढ्नुपर्ने उनको आग्रह थियो ।

राजनीतिलाई भावना र उत्तेजनाभन्दा पर आर्थिक समृद्धिको महाअभियानमा संसद बैठक केन्द्रित हुनुपर्ने उनको भनाइ छ । विभेद र बहिष्करणलाई अस्वीकार गर्दै राष्ट्रिय एकता बलियो बनाउन, समृद्ध र न्यायपूर्ण राष्ट्र निर्माण यो प्रतिनिधिसभा सार्थक संवादको थलो बन्नेमा आफु विस्वस्त रहेको उनले बताए ।

प्रचण्डले भने, ‘हाम्रा अभ्यासहरूमा जनताले गौरव गर्ने वातावरण बन्नेछ । राष्ट्रका आवश्यकताका बारेमा विवेकपूर्ण निर्णय लिइनेछ । सहमतिमात्रै होइन हाम्रा मतभेद पनि मर्यादापूर्ण हुनेछन् । हामी भर्खरै जननिर्वाचित भएका छौं । जनताको हामीमाथिको समर्थन ससर्त छ भन्ने लाग्दछ‚ निःसर्त छैन । हामी सुशासन दिन सक्छौं वा सक्दैनौं ? जनताको जीवनमा सार्थक परिवर्तन ल्याउन सक्छौं वा सक्दैनौँ ? ।’ मंसिर ४ गते भएको प्रतिनिधिसभा निर्वाचनपछि सोमबार पहिलोपटक संसद् बैठक बसेको हो । बैठकमा सबै राजनीतिक दलका शीर्ष नेताहरूले सम्बोधन गर्ने कार्यक्रम छ ।