प्रतिक्रियावादीको घेराबन्दी तोडेर सरकारको नेतृत्वमा पुगेको हुँ : प्रधानमन्त्री

२७ पुष, काठमाडौं । नेकपा माओवादीका अध्यक्ष एवं प्रधानमन्त्री पुष्पकमल दाहाल प्रचण्डले प्रतिक्रियावादीहरुको घेराबन्दीलाई चिरेर सरकारको नेतृत्व गर्न पुगेको भन्दै यो सफलतालाई कम आक्न चेतावनी दिएका छन् ।

उनले आफूलाई प्रधानमन्त्री बन्नबाट रोक्न देशीविदेशी शक्तिहरु लागे पनि सफल नभएको भन्दै आफू संसदबाट शक्तिशाली प्रधानमन्त्रीको रुपमा अएको दावी गरेका छन् ।

बुधबार काठमाडौंमा योङ कम्युनिस्ट लिग, नेपाल (वाईसीएल)को तेस्रो पूर्ण बैठकलाई सम्बोधन गर्दै प्रधानमन्त्री प्रचण्डले सरकारले युवाहरुलाई रोजगारी र राजनीतिक नियुक्तिहरुमा उच्च प्राथमिकता दिने आश्वासन दिए । उनले सरकारले युवालाई रोजगारी र राजनीतिक नियुक्तिहरुमा अधिकतम स्थान दिने पनि बताए । प्रचण्डले माओवादीको युवा सक्तिले सरकारलाई सहयोग गर्नुपर्ने बताए ।

पार्टीका युवाहरुको धेरै मद्दत चाहिएको उनको भनाइ थियो । उनले प्रतिक्रियावादीहरुको घेराबन्दीलाई चिरेर सरकारको नेतृत्व गर्न पुगेको भन्दै यो सफलतालाई कम आक्न नहुने बताएका थिए । ‘यतिबेला सरकार र पार्टी नेतृत्वलाई तपाईँहरुको धेरै मद्दत चाहिएको छ ।

प्रतिक्रियावादीहरुका धेरै घेराबन्दीहरुलाई चिरेर यहाँ आइपुगियो । सजिलै आएको होइन । हामीले हिजो जसरी घेरा तोड्ने र प्रतिरोध गर्ने रणनीति बनाउँथ्यौँ अहिले पनि घेरा तोड्ने र प्रतिरोध गर्ने प्रक्रिया भित्रबाट यो सफलता, पार्टी, आन्दोलन, नेपाल, नेपाली, हामी सबैलाई प्राप्त भएको हो । यसलाई हामी कसैले पनि कम आँक्नु हुँदैन ।’

यस्तै युवाहरूलाई रोजगारी र नियुक्तिका विषयमा पनि आफ्नो ध्यानाकर्षण भएको भन्दै उनले त्यसलाई सम्बोधन गर्ने अधिकतम प्रयास गर्ने बताए । उनले आफ्नो संगठनलाई बलियो बनाएर अघि बढ्न युवाहरुलाई निर्देशन पनि दिएका थिए । सरकारका काम कारवाहीमा सहयोग गर्न आवश्यक रहेको भन्दै आफ्नो नेतृत्वमा सरकार भएकाले पार्टीका युवाहरुका लागि काम गर्न राम्रो अवसर भएको प्रधामन्त्रीको भनाइ छ ।