मन्त्रिपरिषद विस्तारबारे छलफल गर्न बालकोट जाँदै प्रचण्ड

२७ पुष, काठमाडौं । प्रतिनिधिसभाबाट विश्वासको मत पाएसँगै प्रधानमन्त्री पुष्पकमल दाहाल ‘प्रचण्ड’ले मन्त्रिपरिषद विस्तारका लागि छलफल सुरु गरेका छन् । मन्त्री र मन्त्रालयबारे छलफल गर्न प्रधानमन्त्री प्रचण्ड केहीबेरपछि नेकपा एमालेका अध्यक्ष केपी शर्मा ओलीको निवास बालकोट पुग्दैछन् ।

प्रधानमन्त्रीनिकट स्रोतका अनुसार गोरखाबाट फर्किएर छलफलका लागि प्रधानमन्त्री बालकोट जाने कार्यक्रम रहेको छ । पुष १० मा प्रधानमन्त्रीमा नियुक्त भएका प्रचण्डले मन्त्रिपरिषद विस्तार गर्न सकेका छैनन् भने भएका मन्त्रीहरुलेसमेत जिम्मेवारी पाएका छैनन् ।

सरकारमा सहभागि हुन चाहने दलहरुले उपप्रधानसहित महत्वपूर्ण मन्त्रालय मागेकाले विश्वासको मत दिन अघि मन्त्रिपरिषद विस्तार गर्ने आँट प्रधानमन्त्री प्रचण्डले गरेका थिएनन् । विश्वासको मत पाएपछि आजबाट मन्त्री छानने छलफल सुरु गर्न लागेका हुन् । बालकोटमा मन्त्रिपरिषद् विस्तारबारे सत्तासाझेदार दलहरूबीच छलफल हुने बताइएको छ ।

सत्ता साझेदारमध्येको सबैभन्दा ठूलो दल नेकपा एमालेबाट चार मन्त्री नियुक्त भइसकेका छन् । एमालेका उपाध्यक्ष विष्णु पौडेलले उपप्रधान एवं अर्थमन्त्रीको जिम्मेवारी पाइसकेका छन् । एमालेका नेताहरू दामोदर भण्डारी, ज्वालाकुमारी शाह र राजेन्द्रकुमार राई पनि मन्त्रीमा नियुक्त भइसकेका छन् । बिनाविभागीय मन्त्रीका रूपमा शपथ लिएका उनीहरूको मन्त्रालय टुंगो लाग्न बाँकी छ ।

अब एमालेबाट को–को मन्त्री हुनेछन् भन्ने निर्णय भइसकेको छैन । एमालेले मन्त्रालयको टुंगो लागेपछि मन्त्रीका लागि मापदण्ड बनाउने बताएको छ । अहिले कसले कुन–कुन मन्त्रालय पाउने भन्ने टुंगो लागिसकेको छैन । प्रधानमन्त्री गोरखाबाट बालकोट पुगेपछि मन्त्रालयबारे छलफल हुनेछ ।