गृहमन्त्रीको निर्देशनमा १७ डीआईजीको सरुवा, प्रदेश प्रमुख पनि फेरिए

२८ पुष, काठमाडौं । प्रधानमन्त्री पुष्पकमल दाहाल ‘प्रचण्ड’ नेतृत्वको सरकारले मन्त्रिपरिषदलाई पूर्णता दिन नसकिरहेका बेला आकस्मिक रुपमा नेपाल प्रहरीका १७ जना प्रहरी नायव महानिरीक्षक (डीआईजी) हरु को काज सरुवा गरिएको छ । प्रदेश सरकारले मुख्यमन्त्री पाए लगत्तै केन्द्रले यति ठूलाे संख्यामा डीआईजीहरुको काज सरुवा गरेको हो ।

नयाँ गृहमन्त्री आएपछि गरिएको यो पहिलो सरुवा हो । उपप्रधान तथा गृहमन्त्री रवि लामिछानेले कुनै पनि काम कारवाही हस्तक्षेप मुक्त हने भनिरहेका बेला उनकै इच्छामा डीआईजीहरुको काज सरुवा र प्रदेश प्रमुखहरुको जिम्मेवारी हेरफेर भएको बताइएको छ । सरुवामा राजनीतिक प्रभाव परेको भन्दै प्रहरीभित्र असन्तुष्टि पनि बढेको बताइन्छ ।

बिहीबार भएको सरुवा अनुसार प्रहरी प्रधान कार्यालय, नक्सालमा कार्यरत डीआईजी बसन्तबहादुर कुँवरले मधेश प्रदेश प्रहरी कार्यालयको जिम्मेवारी पाएका छन् । मधेशका प्रहरी प्रमुख मसाउद आलम खाँ उपत्यका प्रहरी कार्यालय, रानीपोखरी आएका छन् । कर्णाली प्रदेशका पोषराज पोख्रेल प्रहरी महानिरीक्षकको सचिवालयमा आएका छन् भने भीमप्रसाद ढकाल कर्णाली प्रदेश पुगेका छन् ।

प्रहरी प्रधान कार्यालयका डीआईजी दीपक थापा बागमती प्रदेश प्रहरी कार्यालय, हेटौंडामा खटाइएका छन् । अशोक सिंहले सुदूरपश्चिम प्रदेश प्रहरी कार्यालय, धनगढीको जिम्मा पाएका छन् । प्रहरी प्रवक्ता रहेका टेकप्रसाद राईले लुम्बिनी प्रदेश प्रहरी कार्यालय, दाङको जिम्मा पाएका छन् । गण्डकी प्रदेशको नेतृत्व बुद्धिराज गुरुङले पाएका छन् । सुदूरपश्चिम प्रदेशको जिम्मेवारी पाएका सिंहले निर्मला पन्त बलात्कार घटनाबारेको अनुसन्धान पनि अगाडि बढाउनु पर्नेछ ।

प्रदेश १ प्रहरी कार्यालय, विराटनगरको नेतृत्व श्यामलाल ज्ञवालीले पाएका छन् । उनी त्रिभुवन अन्तर्राष्ट्रिय विमानस्थलको नेतृत्वमा थिए । विमानस्थलमा किरण राणा खटाइएकी छन् । विशेष ब्यूरोमा सुदीप गिरी पुगेका छन् । प्रहरीका डीआईजीहरुको सरुवाले नेपाल प्रहरीमा यतिबेला खैलाबैला मच्चिएको छ ।

हेर्नुस को कहाँ सूचीसहितः-