सभामुख निर्वाचनबारे कांग्रेसले अन्य दलसँग छलफल गर्ने

२८ पुष, काठमाडौं । नेपाली कांग्रेसले माघ ५ गते हुने प्रतिनिधिसभाको सभामुख निर्वाचनको तयारीबारे अन्य दलहरुसँग समन्वय गर्ने जिम्मा सभापति शेरबहादुर देउवालाई दिएको छ । सरकारलाई विश्वासको मत दिएको कांग्रेसले सभामुख र उपसभामुखमा सघाउन वार्ता थाल्ने भएको हो ।

पार्टी सभापति शेरबहादुर देउवाको निवासमा बसेको पदाधिकारी बैठकले सभामुख र उपसभामुख चुनावमा सहकार्यका लागि दलहरुसँग छलफल थाल्ने निर्णय गरेको हो । आगामी माघ ५ र ७ गते सभामुख र उपसभामुखको निर्वाचन हुँदै छ । त्यसमा उमेदवारी दिने विषयमा दलहरुसँग छलफल गर्ने निर्णय भएको छ । उमेदवारी कुन पदमा दिने र अरु दलहरु को कोसँग सहकार्य हुनसक्छ भनेर अब कांग्रेस सभापति देउवाले छलफल थाल्नेछन् ।

कांग्रेसले प्रधानमन्त्रीलाई विश्वासको मत दिएपछि सत्ता गठबन्धनमा अविश्वास बढीरहेको छ । एमालेसँग मिलेर सरकारको नेतृत्व सम्हालेको नेकपा (माओवादी केन्द्र) कांग्रेससँगको सहकार्यमा जाने विषयमा टिप्पणी भइरहेका छन् । पदाधिकारी बैठकले सभामुख, उपसभामुख निर्वाचनबारे छलफल गर्दै कांग्रेसबाट उम्मेदवार उठाउने÷नउठाउने विषयमा अन्य दलहरुसँग समन्वय गर्ने जिम्मा सभापति देउवालाई दिने निर्णय गरेको एक नेताले जानकारी दिए ।

यस्तै प्रदेश सभामुख र उपसभामुख निर्वाचनबारे निर्णयको अधिकार प्रदेश कार्यसमितिलाई दिने निर्णय पनि गरिएको छ । ती नेताका अनुसार बैठकमा पार्टी केन्द्रीय समिति बैठकअघि नै भ्रातृ संगठनहरुलाई पूर्णता दिने विषयमा पनि छलफल भएको छ । कांग्रेसको महिला संघ, तरुण दल, नेविसंघलगायतमा अध्यक्षमात्रै नियुक्त गरिएको छ । अन्य पदाधिकारी तोकिन बाँकी छ । कांग्रेस केन्द्रीय कार्यसमिति बैठक आउँदो माघ १५ गतेका लागि बोलाइएको छ ।