मिनि ट्रकको ठक्करबाट माेटरसाइकल चालकको मृत्यु

२९ पुष, चितवन । चितवनको रत्ननगरमा मिनि ट्रकको ठक्करबाट एक जना युवकको मृत्यु भएको छ ।

जिल्ला प्रहरी कार्यालय चितवनका अनुसार रत्ननगर नगरपालिका १० बस्ने २२ वर्षीय अमित महतोको घटनास्थलमै मृत्य भएको हो ।

मोटरसाइकल पछाडी सवार रत्ननगर नगरपालिका १० का २७ वर्षीय बिश्वास महत्तो गम्भीर घाइते भएका छन् । महत्तोलाई उपचारको लागि पुरानो मेडिकल कलेज भरतपुर पुर्‍याइएको चितवन प्रहरीले जनाएको छ ।

शुक्रबार मध्यान्ह १२ बजे रत्ननगर नगरपालिका १२ जमुनापुरबाट बकुलहर जाँदै गरेको ना ४२ प ४४५३ नम्बरको मोटरसाइकललाई विपरीत दिशाबाट आएको ना ४ ख ५३०१ नम्बरको मिनि ट्रकले ठक्कर दिएको थियो ।

दुवै सवारी साधन र ट्रक चालकलाई इलाका प्रहरी कार्यालय रत्ननगर टाँडीले नियन्त्रणमा लिएको छ ।