सल्यानमा ‘देउता’लाई मनाउन बालकको हत्या

२ माघ, काठमाडौं । सल्यानमा एक बालकलाई ‘बली’ दिएर हत्या गरेको घटना सार्वजनिक भएको छ । बनगाड कुपिण्डे नगरपालिका–१० माझकाँडाका ३४ वर्षीय डम्बर पुरीले यही आइतबार दिउँसो आफ्नै सहोदर भान्जा सोही गाउँका ८ वर्षीय भिजन घर्तीको ‘बली’ दिएर हत्या गरेका हुन् ।

पुरीले दिउँसो करिब २ बजेतिर आफ्नै घरको आँगनमा रहेको मन्दिरभित्र ‘देउता’लाई मनाउन धारिलाे हतियारले घाँटी छिनाएर दिएर ‘बली’ दिएको खुलेको छ ।

घटनाबारे पुरीकै छोराले देखेर छिमेकीलाई खबर गरेपछि घटना बाहिर आएको हो । भिजनलाई मन्दिरमा ‘बली’ दिएपछि शवलाई मन्दिरभित्रै गाड्दै गर्दा छोराले देखेको र उसैबाट छिमेकीलाई खबर भएपछि खबर प्रहरीसम्म पुगेको हो । खबर पाएलगत्तै प्रहरी चौकी बनगाड, इलाका प्रहरी कार्यालय देवस्थल र जिल्ला प्रहरी कार्यालयबाट खटिएको टोलीले पुरीलाई सबुदसहित पक्राउ गरिएको छ । उनलाई जिल्ला प्रहरी कार्यालयमा राखिएको छ ।

झण्डैदुई वर्षदेखि आफूमा देउता चढेको भन्दै पुरी काम्ने र अस्वभाविक गतिविधि गर्दै आइरहेका छिमेकीहरुको भनाइ छ । प्रहरीले पुरीको मानसिक अवस्थाबारे पनि अनुसन्धान गरिरहेको छ । उनी सानो छोरा लिएर परिवारदेखि अलग भएर बस्दै आएका थिए ।