मेट लाइफ इन्स्योरेन्सको नयाँ बोनस दर, अधिकतम ८० रुपैयाँ

२ माघ, काठमाडौं । बीमा कम्पनी मेट लाइफ इन्स्योरेन्सले नयाँ बोनसदर सार्वजनिक गरेको छ । कम्पनीले आर्थिक वर्ष २०७८÷७९ को लागि आफ्ना बीमितहरुको लागि नयाँ बोनस दर सार्वजनिक गरेको हो ।

अमेरिकन लाइफ इन्स्योरेनस कम्पनीको आव २०७८/७९ को बीमांकीय मूल्यांकन अनुसार मुनाफामा सरिक हुने सम्पूर्ण जीवन बीमालेखहरुको लागि कम्पनीले न्यूनतम प्रतिहजार ४५ रुपैयाँदेखि अधिकतम ८० रुपैयाँसम्म बोनसदर निर्धारण गरेको छ ।

जसमा कम्पनीले सावधिक जीवन बीमालेखअन्तर्गत एक वर्षदेखि १५ वर्षसम्मको लागि ६० रुपैयाँ, १६ वर्षदेखि २० वर्षसम्मका लागि ७० रुपैयाँ र २१ वर्षभन्दा माथिका लागि ८० रुपैयाँ बोनसदर निर्धारण गरेको छ ।

त्यस्तै, कम्पनीले शिक्षा संरक्षण योजनाअन्तर्गत १ वर्षदेखि १५ वर्षसम्मको लागि ६० रुपैयाँ, १६ वर्षदेखि २० वर्षसम्मका लागि ७० रुपैयाँ र २१ वर्षदेखि माथिका लागि ८० रुपैयाँ बोनसदर निर्धारण गरेको छ ।

यस्तै कम्पनीले उमेर समूहअन्तर्गत पनि अग्रिम भुक्तानी योजनाअन्तर्गत १ वर्षदेखि १५ वर्षसम्मका लागि ४५ रुपैयाँ, १६ वर्षदेखि २० वर्षसम्मका लागि ५५ रुपैयाँ र २१ वर्ष वा सो भन्दा माथिका लागि ६५ रुपैयाँ बोनसदर निर्धारण गरिएको छ ।